Arnanut Qimarnguik
Arnanut qimarnguik qimarnguffiugallartarpoq. Tarnikkut timikkulluunniit nakuuserfigineqarsimaguit imaluunniit siorasaarneqarsimaguit Qimarnguimmiissinnaavutit. Meeraqaruit taakku Qimarnguimmut ilagisinnaavatit.
Ulloq unnuarlu pigaartup oqarasuaataanut 55 46 47-mut imaluunniit piffissami 8.00-imiit 16.00-ip akornanni 36 61 13-imut sianissaatit aamma C.P. Holbøllsvej 8-mi allaffimmut saaffiginnissinnaavutit.
Meeqqat Qimarnguimmiittut
Qimarnguimmiinnissaq pillugu aalajangerneq ajornakusoortuuvoq meeqqanullu sunniuteqartarluni. Meeqqat avatangiisiminnit sungiussimasaminnit qimagutissapput immaqalu aamma angerlarsimaffimminni assortuunnernik, nakuusernernik allatulluunniit sakkortuuliornernik misigisaqartarsimassallutik. Sinittarfiit illullu ataatsimoortarfittut isersimaartarfii tamarmik fjernsyneqarput.
Akigitinneqartoq akiliinerlu
Akiligassaq Kommuneqarfik Sermersuup karsianut akiligassanngorlugu kingusinnerusukkut nassiunneqassaaq.
Qimarnguimmiinnerit akilersinnaanngikkukku, isumaginnittoqarfimmi sullissisut aqqutigalugu akiliinissannut ikoqqusinnaavutit. Isumaginnittoqarfik itigartitsissagaluarpat imaluunniit ilaannakoortumik ikiorsiisinnaappat, akiligassap sinnera kommunip akiligassaleriffia aqqutigalugu akileqquneqassaaq.
Arnat persuttarneqarsimasut oqaloqatiginnissinnaalerput
Arnat persuttagaasimasut ilaqutaallu qimarngunermi oqaloqateqarnissamut, aappariittut oqaloqateqarnissamut imaluunniit sullissisorisaq aqqutigalugu imaluunniit Meeqqanut Ilaqutariinnullu Ingerlatsivik aqqutigalugu Meeqqanut Ilaqutariinnullu Sullissivimmut innersuunneqarsinnaapput.
Qimarnguimmi ulluinnarni attaveqaataasoq isumaginninnermut siunnersortitut ilinniarsimasuuvoq.