Meeqqanut Atuarfeqarnermullu Ingerlatsivimmit ilinniagaqarneq inuussutissarsiuteqarnerlu pillugit ilitsersuisarneq pillugu Inatsisartut inatsisaata allanngortinneqarnera pillugu Inatsisartut inatsisissaattut siunnersuut pillugu tusarniaanermut akissuteqarsinnaanini pillugu qujassutigineqarpoq. Siunnersuut Naalakkersuisut Ilinniartitaanermut periusissiaat 2024-2030-p ingerlateqqinneqarnerata aamma siusinnerusukkut nalilersuisimanerit kingunerisigut innersuussutigineqartut malitsigisaannik tunngaveqarnera Ingerlatsivimmit akuerineqarpoq. Tassani ersersinneqarpoq, ilitsersuisarnermik suliniut siunnerfilerlugu assigiissaarlugulu ingerlateqqinneqarnissaa suli kissaatigineqartoq, aamma suliffeqarfiit tunniussisussat aaqqissuussaasumik akuutinneqassasut – pingaartumik meeqqat atuarfianni angajullernut tunngatillugu.
Siunnersuummi inuusuttut 18-it inorlugit ukiullit ilitsersorneqartarnerat pillugu akisussaaffik pingaarneq meeqqat atuarfiinut tunniunniarneqarpoq (§§ 19-23). Ingerlatsivimmit nalilerneqarpoq, tamanna annertuumik suliassatigut aaqqissuussaanikkullu unammilligassaqartoq. Ilitsersuinermik atuuffik ullumikkut atuartitsinerup saniatigut ingerlanneqakkajuttarpoq, meeqqallu atuarfianni atorfiup aaqqissugaanerani piffissaq tamakkerlugu ilitsersuisartut inissaqartinneqanngillat. Taamaattumik siunnersuut akuerineqarpat tamanna ilinniartitsisut isumaqatigiissutaannik allannguinermik kinguneqartariaqarpoq, piginnaasanut nutaanut aningaasaliinermik kiisalu meeqqat atuarfiannut saniatigut nukissanik nutaanik tunniussaqarnissamik.
Inatsisissatut siunnersuummi siunissami atuarfiit ujartuillutik ilitsersuinermik ingerlataqarnissaat piumasarineqarpoq – aamma inuusuttunut meeqqat atuarfiannik qimatsereersimasut (§ 20, imm. 2). Tamanna inunnut paasissutissanik mianernartunik pissarsinissamik pisariaqartitsivoq aamma atortutigut ikorfartuinermik, ullumikkullu meeqqat atuarfii peqanngillat. Nunaqarfinnilu atuarfiit ilitsersuinermik ilinniagaqarsimasunik sulisoqanngilluinnarput, tamatumanilu ataatsimoortumik iliuuseqaqatiginnissamik eqqarsarnissaq pisariaqarpoq piginnaasanik ineriartortitsineq paasissutissanillu agguaasarneq qitiutillugit.
Allannguutit Majoriap iliuusissatut pilersaarutinik atuartullu pillugit paasissutissanik tigusisarunnaarnissaanik aamma kingunerissavaat. Tamanna siunnersuinerup ingerlaannarnissaata qanoq qulakkeerneqarnissaa pillugu apeqqummik pilersitsivoq, inuusuttoq 18-inik ukioqaleraangat, aamma Majoriaq attaveqarnermik akisussaaqqilerpat. Inuusuttut aaqqissugaanermiit katataaratarsinnaanerat aarlerinaateqarpoq, ersarissumik tunniussinermut ilusissamik pilersitsisoqanngippat aamma ilitsersuisarnerup uppernarsaataannik toqqorterisarneq aallartinneqanngippat.
Peqatigitillugu meeqqat atuarfiata innersuussinernik, assersuutigalugu tarnikkut ikiorserneqarnissamut, katsorsartinnissamut imaluunniit suliffissarsiuussinermi suliniutinut, qanoq isumaginnissinnaanera ersernerluppoq, tamannalu atuarfiup nalinginnaasumik suliassaqarfiata avataaniippoq. Atuuffiit taakkua ilitsersuinermut ilanngunneqassappata, taava suleqatigeeriaatsimut ilusissaq pilersinneqassaaq suliassamullu nukissat.
Ingerlatsiviup maluginiarpaa, inuusuttut inuussutissarsiornermik ilinniarfinnut ikaarsaarneranni unammilligassaq annerusumik tassaasoq tigusisussat killeqartarnerat. Suliffeqarfiit amerlasuut taamaallaat 18-ileereersimasunik tigusisinnaapput, tamatumalu periusissiap anguniagaanik piviusunngortitsinissamut ajornakusoortitsivoq, qanorluunniit ilitsersuineq iluseqartinneqaraluarpat. Inatsimmik allannguutip aporfik taanna aaqqiffiginavianngilaa, saniatigullu iliuuseqartoqartariaqarpoq inuusuttut ilumut ilinniarnissaminnut periarfissaannik qulakkeerinnikkumalluni.
Inatsisissatut siunnersuut kommunit suliffeqarfiisa akornanni iluminni allatut agguataarinertut oqaatigineqarpoq. Ingerlatsiviup erseqqissassavaa, suliassat immikkut ilitsersuinertut ittuummata annertuumillu aaqqissuussaanermik, sulisunik aamma missingersuutinik allannguineq pisariaqarmat. Ilanngullugu isumaqatigiissutinut tunngasut aamma atuarfiit suliffeqarfiillu tigusisussat akornanni suleqatigiinnermut tunngasut eqqarsaatigineqassapput – qitiusumik ilinniarfiit aamma GUX ilanngullugit – taakkulu allaffissornikkut artukkerneqaratarsinnaapput, siunnersuinermi attaveqartarneq siammarterneqassammat.
Inatsit taamatut iluseqartillugu akuerineqassappat taava nalunaarusiortoqarnissaa kaammattuutigineqassaaq, ujartuilluni ilitsersuinermut najoqqutassalimmik, tassa inatsisip allannguutaata malunniutaa tunngavigalugu, aamma Majoriap massakkut atuuffii misilittagaalu ilaatiinnarneqassasut. Ilitsersuineq pillugu siunissami ilusissap atuuttunngortinneqarnissaanut peqqissaartumik peqataanissarput qilanaarivarput, tamanna suliatigut attanneqarsinnaavoq kommunillu ingerlanneqavinnerannut tulluussagaalluni.