Holdit sisamat kommunitsinneersut pitsaanerit tallimat akornanni inissipput. Sapaatip akunnerani kingullermi U15-inut futsalimi Nunatsinni pissartanngorniuttoqarnerani kommunitsinneersut maluginiarnartumik angusaqarluarput. Pissartanngorniunneq Nuummi ingerlanneqarpoq, Nunarput tamakkerlugu peqataaffigineqarluni.
Klubbit pissartanngorniunnermi takutitsilluarnerat Kommuneqarfik Sermersuumi peqatigiiffilerinermi eqeersimaartoqarneranut peqqinnartumillu ingerlanerannik takussutissaaginnanngilaq aammali holdit peqataatitaat Nunatsinni pitsaanerpaanut nallersuussinnaanerannik takussutissaalluni. Klubbit sisamat kommunitsinneersut pikkorinnerit akornannut unammilluarsinnaanertik takutippaat, tamannalumi takussutissaavoq kommunimi timersornermi peqatigiiffilerinermilu ataatsimoorluarsinnaassuseqartut.
Borgmester Avaaraq Olsen holdit peqataatitatta angusaqarluarnerannut nuannaarnini tulluusimaarninilu oqaasertalerpaa: “Kommunerput tamaat sinnerlugu arsartut, arsaqatigiit klubbillu angusaannut ajasoornartumut uummammik pisumik pilluaqquakka. Tamannalu najukkami peqatigiiffinnik tapersersuiuarneq allanngueqataasinnaaneranut uppernarsaataalluarpoq – timersornermi angusarissaarneq kisimi pinnagu aammali peqqinnartumik nukittuumillu attaveqatigiissinnaanerup inerisarnera eqqarsaatigalugu.”
Kommunimmi ukiorpaalussuarni sumiiffimmi peqatigiiffilerinermut tunngasut salliutittuartarpai – tassani timersornikkut kulturilerinikkullu neqeroorutinut tunngasut ilanngullugit. Peqatigiiffissinnut aningaasatigut tapiiffigineqarnissamik kissaateqarussi, tapiissuteqartarnermut tunngasut kommunip nittartagaani annertunerusumik atuarsinnaavasi:
Aningaasartuutinik tapiissutinillu qinnuteqarfissat – Kommuneqarfik Sermersooq
Kommunitsinneersut pitsaanerit tallimat akornanni inissinnerat:
#1 B67
#2 IT-79
#3 Nagtoralik
#5 ATA