Igdlo, Inuusuttut kulturikkut illuat, illoqarfimmi inuusuttunik kinguaassiuutinut tunngasunik ilinniartitsinissamut paasititsiniaanissamullu assigiinngitsunik sammisaqartitsinernut ulluni 14-ini kingullerni qitiusumik inissisimavoq. Suliniut, Isaqqiimik taaguutilik, tassaavoq inuusuttumiit inuusuttumut kinguaassiuutinut tunngasunik ilinniartitsinermut pikkorissartitsineq, tulluusimaarutigalugu pingajussaa ingerlatsisimanermut nalliuttorsiutigineqarsinnaavoq.
Isaqqii pillugu pikkorissartitsinermi Tasiilami inuusuttut ukioqatiminnut kinguaassiuutinut tunngasunik ilinniartitsinissaannut atortunik pisariaqartitaannik ilisimasassaannillu tunineqarnissaat siunertaavoq. Tassunga ilaapput sapaatip-akunnerani annertusisamik kinguaassiuutinut tunngasunik ilinniartitsineq, kingornalu sapaatip-akunnera atorlugu qanoq podcastsinik, videonik, paasititsiniaanernik suliaqartoqartarnersoq kiisalu unnukkut paasititsiniaalluni pilersaarusiortoqartarnersoq nunaqarfinnullu angalasarnerit pillugit ilinniartitsinermut atorneqarpoq. Sammisaqartitsinerni illoqarfimmi nunaqarfinnilu qanittumiittuni kinguaassiuutitigut peqqissuuneq pillugu ilisimasanik siammarterinissaq siunertarineqarpoq.
”Pikkorissarnermi peqataasut ilikkagaqaannanngillat, peqataasulli aamma ineriartorluarput. Peqataasut sapersorinngisaminnut killissatik qaangertarpaat, pisinnaasalittullu tunniusimasutullu ilinniartitsisutut qaffattarlutik. Ullut ingerlaneranni nutaaliornermik, alapernaassusermik, pinnguarnermik pilersitsinermillu sammisaqarput”, Pernille Thorup, Tasiilami Tsuleralingiippuumi ineriartortitsinermut pisortaq oqarpoq.
Suliniutip Isaqqiip aallartinneranut politiinut nalunaarusiaq 2019-imeersoq pissutaavoq, tassani sumiiffimmi kinguaassiutinut tunngasunik pinerluttoqarsimaneranut tunngatillugu iliuuseqartoqartariaqarnera tunngavigalugu Tasiilami illoqarfimmit aallartinneqartumik kinguaassiuutinut tunngasunik ilinniartitsisoqarnissaanik erngertumik pisariaqartitsisoqartoq ersersinneqarpoq. Igdlop sulisui, “Sustainable Now”-imeersut qanimut suleqatigalugit, taamatut kaammattuisoqarnera tunngavigalugu paasititsiniaanerit peqataatitsillunilu pikkorissartitsinerit ingerlanneqarnissaat aaqqissuuppaat.
Pikkorissarnerup naammassinera peqataasut suliniuteqarnerannut unitsitsinngilaq. Ingerlatitseqqiisinnaasumillu ataqatigiissaarineq pillugu aaqqissuussaanermik pilersitsisoqarpoq, attassisinnaasumik Aaqqissuussaanermi tassani suliatigut assigiinngitsunik tunuliaquteqartut peqataatinneqarput – Majoriamit aamma Meeqqanut Ilaqutariinnullu Sullissivimmit napparsimmavimmi sulisunut aamma illoqarfimmi politiinit – tamarmik kinguaassiuutinut tunngasunik ilinniartitsinerup ingerlaannarnissaanik qulakkeerinissamut tunniusimalluinnartut.
Inuusuttut peqataasut gruppinik pingasunik aalajangersimasunik qulequtalinnik pilersitsereerput; gruppe ilinniartitsisartoqatigiit , gruppe nunaqarfinnut angalasartoqatigiit aamma gruppe paasititsiniaasartoqatigiit, taakkulu illoqarfimmi suliniutinik amerlanerusunik aallartitsinissaminnut qilanaalereerput. Gruppit taakku ukioq tamaat sammisassaqartitsinernik ilinniartitsinermillu neqerooruteqarnissamik ataatsimut siunertaqarput, ukiumullu pilersaarut siulleq inissereerpoq.
”Patajaatsumik attaveqaateqarnikkut assigiinngitsunillu suliaqartunik suleqateqarnikkut gruppe ataqatigiissaarisartoqatigiit sunniisinnaanerminnik ineriartortitsinissartik qilanaarisinnaavaat inuusuttunillu amerlanerusunik nunaqarfinnut angalaqataasussanik paasisitsiniaanermillu sammisaqartitsinissamut peqataasussanik ilassarsiorsinnaapput. Suliniutissat ataqatigiissarnissaannut suliniutaallu Tasiilami eqqaanilu suliamut naleqquttuujuarnissaa peqataanissarlu tamanut periarfissaajuaannarnissaa qulakkeerniarlugu ataavartumik ataatsimiittarnissartik pilersaarutigaat.”, Pernille Thorup oqarpoq, nangillunilu;
”Isaqqii isumaginninnikkut ajornartorsiutit assigiinngitsut aaqqiissuteqarfiginiarlugit illoqarfimmi inuiaqatigiit qanoq suleqatigiissinnaanerannut assersuutitsialaavoq. Ilinniartitsinikkut, tunniusimanikkut ataatsimoornikkullu innuttaasut inuusuttut siunissami peqqinnarnerusumik inuuneqarnissaat annertunerusumillu paasititsiniaanerit ingerlanneqarnissaat pillugu Tasiilami pingaaruteqarluinnartunik alloriaateqartoqarpoq”, naggaserlugu oqaaseqarpoq ineriartortitsinermut pisortaq Pernille Thorup.
