Ullut kingulliit qulit ingerlanerini Air Greenlandip Tasiilamiit timmisartuussinissaralui tamarmik unitsiinnarneqartarput. Piffissami tamatumani Iceland Air Kulusukkoorluni timmisartuussereerpoq. Ullumikkut marlunngornermi kiisami Nuummut timmisartoqarpoq.
Timmisartuussinissaraluit sisamat tulleriit taamaatiinnarneqartarnerat ajoraluartumik takornartaanngilaq. Ukioq mannaannaq taamaatiinnartut amerlaqaat, aamma Air Greenlandip kisitsisaatai naapertorlugit 2022-mi Tunumi timmisartuussinissaraluit taamaatinneqartut 60 procentiupput.
“Tamanna attanneqarsinnaanngilaq. Kinguaattoornerit Tasiilami nunaqarfittaanilu inuunermi sutigut tamatigut annertuunik kinguneqartitsisarput. Inuussutissarsiuteqartunut, takornarialerinermut pisortanilu kiffartuussisunut aserorsaataavoq, aamma nakorsiartunut innuttaasunullumi annertuumik kinguneqartarpoq,” borgmesteri Avaaraq Olsen oqarpoq.
Kommuneqarfik Sermersuumi timmisartuussinissaraluit taamaatiinnartarneri ulluinnarni ingerlatsinerup tungaatigut ajornartorsiutaasoq malugineqartarpoq. Ilaatigut innuttaasut pisariaqartitaannik kiffartuussisinnaannginnermik kinguneqarsinnaasarpoq.
“Nunap immikkoortuani sap. ak. arlalinni avammut attaveeruttarsinnaaneq pisinnaatillugu sulisunik attassiinnarnissaq ajornartorsiutaasartoq misigisarparput. Taamaattumik Tasiilaq eqqaaniittullu Nuummiit tarnip pissusiinik ilisimasalinnik, isumaginninnermi siunnersortinik timimillu sungiusaasunik pilersortariaqartarpavut, tikittullu pilersaarutigisatik naapertorlugit sap. ak. arlallit sinnerlugit uninngasinnaasarlutik,” Avaaraq Olsen oqarpoq.
Ukioq manna aallartilaartoq borgmesteri Attaveqaqatigiinnermut Naalakkersuisumut allagaqarpoq iliuuseqaqqusissummik ilaatigullu innuttaasut naammaginartumik kiffartuunneqarnissaat qulakkeerniarlugu Air Greenlandimullu kiffartuussinissamut isumaqatigiissutissamik isumaliuteqaqqusilluni.
“Nunatsinni silarluttarpoq, tamanna nalunngilarput, kisianni Tunu eqqarsaatigalugu silamik peqquteqaannarneq ajorpoq. Uagut tungitsinniit takusinnaasarput naapertorlugu Tasiilaq pingaartinneqanngilaq, tamannalu akuerisinnaanngilarput,” Avaaraq Olsen oqarpoq.