Nuummi ippassaq siallingaatsiareersorlu illoqarfimmi sumiiffinni arlalinni immattoortoqarpoq, aqqusinilerisullu taakku ulapputigaat.
Illoqarfiup qeqqani, Brugsenip, Pisiffiup kiisalu Hotel Hans Egedep nalaanni immattoortoqarsimavoq.
Ingerlatsinermut pisortap Margrethe Rosing Hegelund nalunaarutigaa kommunimi sulisut namminersortullu suleqatigiissimasut, namminersortut nivattaatinik milluaatinillu atortulersorlutik suleqataasimallutik. Taamaasilluni milittoornerit aaqqinneqarput, imerlu kuuleqqissimalluni.
Aqqusinilerisut Qinngutsinni Pissisermi uumasut iliveqarfiat imaarsarnissaa maanna ukkatarilerpaat. Tassani sulineq ualimut naammassinissaa naatsorsuutigineqarpoq.