Kommuneqarfik Sermersooq Nuummi angerlarsimaffeqanngitsunut najugaqalivinnissamut sungiusarfik pillugu innuttaasunik ataatsimiititsinermut innuttaasut soqutiginnittut kikkulluunniit qaaqquai. Ataasimiinnermi siunertaalluni paasinninnerulersitsinissaq aammalu ataatsimuusseq nukittorsassallugu, taakkumi pingaaruteqarmata isummat pigiliuteriikkat akiorniarnissaat aammalu kikkut tamarmik inissaqartinneqartutut misigisimalernissaannut.
Nuummi Katersortarfik sisamanngornermi 2024-mi marsip ulluisa 21-anni innuttaasunut ataatsimiiffiuvoq, kommunimiit Namminersorlutik Oqartussaniillu suliniut nutaaq – angerlarsimaffeqanngitsunut najugaqalivinnissamut sungiusarfik Blok 8-miittoq aallartinneqarnera saqqummiunneqarlunilu oqallisigineqarmat.
Oqartussaaffeqarfimmi pisortaq René Kvist ataatsimiinneq ammarlugu oqarpoq suliniuteqarnerup siunertaa tassaasoq: Nuummiut akornanni paasisimasaqarnerulernissaq aammalu ataatsimuussuseq nukittorsarneqarnissaa. ”Siunertaraarput isummat pigiliuteriikkat akiornissaat aammalu kikkut tamarmik inissaqartinneqartutut misiginissaat”, René Kvist nassuiaavoq.
Angerlarsimaffeqanngittuuneq akiorniarlugu aammalu ataatsimuussusermik pilersitsiniarluni Kommuneqarfik Sermersooq Namminersorlutik Oqartussat suleqatigalugit misiliummik suliniuteqarput, angerlarsimaffeqanngitsut 15-it suliffeqareersut najugaqartinneqarlutik inuttut inissisimanermi pitsanngorsaanissaanik periarfissinneqarlutik. Najugaqalivinnissamut sungiusarfik aqqutigalugu angerlarsimaffeqanngitsut najugaqarnissaannik neqeroorfigineqarput: Nuummi Blok 8-mi ineeqqamik tunineqarlutik.
Tamanna ilutigalugu sungiusarnermut peqataatinneqarput, nammineq ineqarnerup nassatai pillugit pisariaqartitsineq aallaavigalugu ilinniartinneqarnissamik periarfissinneqarneq, akiligassanut missingersuusiornermiit aningaasanik aqutsinermut tunngasut ilinniartitsissutigineqartarlutik.
”Innuttaasut ”imminut ikiorsinnaalernissaanut ikiuineq” najugaqalivinnissamut sungiusaanitsinni tunngaviulluinnarpoq. Siunertaalluni angerlarsimaffeqanngitsut sakkussanik tuniorarneqassasut taamaalillutik imminut napatissinnaalersillugit”, aqqusinermi angalaartartuni aqutsisoq Unni Holm Dyring oqarpoq.
Ataatsimiititsineq naammassineqarpoq oqallinnermik isumassarsianillu avitseqatigiinnermik, takkuttut arlallit suliniummut aammalu kommunip angerlarsimaffeqanngitsut pillugit suliuniutaannut assigiinngitsunut tunngatillugit siunnersuuteqarlutillu isummersorput. Kommuneqarfik Sermersuumi sulisut neriorsuipput apeqqutit siunnersuutillu politikkimut tunngasutillit politikkerinut ingerlateqqissallugit.