Kommuneqarfik Sermersooq Meeqqanut Ilaqutariinnullu politikkimik nutarterisussanngorpoq, pingaarnertullu sammineqartussat ilagaat meeqqat inuusuttullu inuuniarnermikkut ajornartorsiuteqartunut isumassuinerup pitsanngorsarneqarnissaa, kiisalu massakkut inisseeriaatsit sukumiisumik eqqarsaatigineqarnissaat nalilersorneqarnissaallu.
“Meeqqanut Ilaqutariinnullu politikkip ineriartortinnissaanut alloriarnertut tulliusussaq pingaarutilik tassaavoq siunissami innuttaasunut inuuniarnermikkut ajornartorsiuteqartunut pitsaasumik ataqatigiissumillu ikorfartuinissamik neqeroorsinnaanermik qulakkeerinninnissaq. Suliaqaqqaarnerup tamatuma politikki ilaqutariinni tamani sumiluunniit naapinneqartartuni inuit isumassuisumik, tapersersuisumik paasinnittumillu inuuneqarnissaannut allannguisumik pilersitsinissaq pillugu anguniakkatta iluaniippoq, Meeqqanut Ilaqutareeqarnermullu Ingerlatsivimmi pisortaq Frederik Lundblad aallaqqaasiutitut suliap pingaaruteqarneranik erseqqissaavoq.
Meeqqanut Ilaqutariinnullu politikki nutaaq kommunimi meeqqanik inuusuttunillu sullissinermi pingaaruteqassasoq naatsorsuutigineqarpoq, meeqqat ikorfartortissaqaratik qimaannarneqartannginnissaasa qulakkeerneqarnissat anguniarlugu. Politikkimik nutaamik suliaqarnerup ingerlarnganut pilersaarut apriilip ingerlanerani politikkikkut akuersissutigisassanngorlugu saqqummiunneqassaaq. Pilersaarut malillugu politikki naammassisaq 2024-mi septembarimi tamanut tusarniaareernerup kingorna politikkikkut siullermeertumik akuerineqassaaq.
Nutarterinermik aallartisartoqarnerani, piffissami kingullermi unammilligassat assersuutigalugu Nuuk Outdoorimut atatillugu ingerlatsivimmit iliuuseqarfigineqareersut tusagassiutini sammineqarput.
Lundblad itisiliivoq: “Politikkimik nutaamik suliaqarneq unammilligassanik taakkuninnga paasinnilluarnissamut saaffiginninnissamullu alloriarneruvoq. Naak taamaattunik unammilligassaqaraluarluta aaqqiissuteqarnissarput aamma sulissutigiuarparput, ilaatigut Namminersorlutik Oqartussat meeqqanut pisariaqartitsisunut tamanut paaqqinnittarfiit inissaqartitsinissaannut qulakkeerinninnissamik pisussaaffiannik ikorfartuilluta.
Nuuk Outdoor massakkut meeqqanik nutaanik Kommuneqarfik Sermersuumeersunik tigummiaqanngilaq, isumaginninnermullu aqutsisoqarfik qanimut suleqatigineqarpoq meeqqat suliffeqarfimmut inissinneqarsimasut sinneruttut naleqquttunik inissarsiuullugit. Peqatigitillugu isumaginninnermut aqutsisoqarfimmit malittarisassat tunngavigalugit siunissami suleqatigiinnissamut akuersisoqarnissaa Nuuk Outdoorimit utaqqineqarpoq.
Poul Petersen, Meeqqanut, Ilaqutariinnut Atuarfeqarnermullu politikikkut ataatsimiititami siulittaasoq, politikkissamik suliaqarneq neriulluaatigaa. “Politikkip nutaap ilusilernissaanut aallartisarnerput ataatsimiititami ilaasortanut tamanut pingaaruteqarpoq. Massakkut unammilligassanuinnaanngitsoq aamma Ingerlatsivimmi siunissami aamma siunnerfilimmik suliaqarsinnaanissaannut najoqqutassanik pilersitsisinnaanissaq anguniagaraarput. Meeqqat tamarmik ingerlalluarnissaat, siusissukkut iliuuseqarnermik, angajoqqaarsiaqarnermik aamma nukissanik pisariaqartinneqartunik pissarsisinnaanissaata taperserneqarnissaatalu qulakkeerneqarnissaat kissaatigaarput.”
Poul Petersen naggasiivoq: ”Politikkissaq siunissami suliassaqarfimmi siunniussinermik tunngaveqassasoq naatsorsuutigaarput. Politikkip nutaap suliarineqarnerani, soorunami ingerlatsivimmi matumani politikkip suliarinera ingerlatiinnarpaat, suleqatigisallu attuumassutillit Isumaginninnermut Aqutsisoqarfik ilanngullugu qanimut suleqatigineqarlutik, meerartatta inuusuttattalu pitsaanerpaamik isumassorneqarnissaat qulakkeerniarlugu.”