Ilusilersuisut apummik kipparissuliamik suliaqarneranni isiginnaarnerup saniatigut Nuummi allanik aamma sammisassarpassuaqarpoq. Ilaatigut nerisassarpassuit.
Ukiormanna Nuuk Snow Fest annertunerulersinneqarpoq, nunatsinni igasut pitsaanersaat peqataatinneqarlutik. Food & Snow Nuuk Nuummi nerisassat pillugit festivaliuvoq nutaaq.
Snow Fest-imi sammisaq assigalugu “Pinngortitaq” atorlugu igasut nerisassiortullu ulluni sisamani sumiiffimmi nerisassaatit taakkunanngalu mamarluinnartut pinngortinneqarsinnaasut pingaartinneqassapput. Igasut nerisassaatitik pitsaanerpaat saqqummiutissavaat meeqqanullu nerisassat pillugit workshoppertinneqarlutik. Taakkua saniatigut iganermi unammisitsisoqassaaq, tassani ilaqutariit illoqarfimmi iggarinnerpaanngorniullutik unammisinnaassallutik.
Visit Nuuk aamma Kommuneqarfik Sermersuumi Inuussutissarsiornermut immikkoortortamit igasoq ilisimaneqarluartoq nutaaliortorlu Inunnguaq Hegelund suleqatigalugu sumiiffimmi nerisassat akornatsinniittut pitsaasut aamma Nunatsinni nerisassioriaatsip ineriartortinnissaanut periarfissat ersarissarumallugit suliniut aallartinneqarpoq.
Inunnugaq Hegelund oqarporlu: ”Qujanartumik ulluinnarni nunatsinni nerisassioriaaseq pillugu ineriartortitserusuttunik oqaluttuarusuttunillu pikkorissunik peqareerpoq. Tunisassiortut, siammarterisut atuisut inuussutissarsiornerillu assigiinngitsut peqatigalugit nerisassat suli pitsaanerusut pingaarnerulersissavagut. Nunamut tikeraaraangavit ass. nerisassat misigisanut ilaallutik pingaaruteqartarput, inoqarporlu nerisaqariaatsimik misigisassarsiorusulluni nunamik toqqaasartunik. Kalaallit Nunaat nerisassat tungaatigut aamma tunniussassaqaqaaq. Periarfissarlu taanna atussavarput.”
Food & Snow-imut aaqqissuussinerit nunatta katersugaasiviata eqqaani pissapput.
Annertunerusumik uani atuaruk:
https://www.facebook.com/profile.php?id=61556579465104
*Pissutaalluni Tallimanngornermi pisussat nuutsinneqarput, Nerisassanik Tuniniaasut Ualimut sisama eqqaaniik, Hotel Nordbo neriniartarfittaani tuniniaassapput. Unammisitsinerit tamarmik Sapaatiuppamut nuutsinneqarput.
