Kommuneqarfik Sermersuup ileqqoq malillugu januaarip arfernani ”Timersortartut Ulluat” ukioq manna aamma aaqqissuuppaa, timersortartut timersoqatigiiffiillu ukioq kingulleq immikkuullarilluinnartumik takutitsisimanerat pillugit nersorniarneqarput.
Timersortartut ulluanni aaqqissuussinerit kommunip illoqarfiini sisamaasuni aaqqissuunneqarpoq, Nuummilu aaqqissuussineq timersortarfissuarmi Inussivimmi ingerlanneqarmat borgmesteri Avaaraq Olsen oqalugiarluni ammaasuuvoq. Borgmesterip oqalugiaammini immikkut eqqaavai timersornerup inuiaqatigiinnik ataatsimoortitsisinnaanera, ataatsimoorfiulluarluni ikinngutitaartitsisinnaasarnera aammalu timersortartut inuiaqatigiinnut sunniuteqarluartarnerat soorlu inuusunnerusunut maligassiuilluartarlutik.
Immikkoortortami Sunngiffimmi fagchefiugallartoq, Sequssuna Fleischer Schmidt borgmester Avaaraq Olsen peqatigalugu pissartanngorsimasut diplomissaannik tunniussisuupput, kommunalpolitikkerit Poul Petersen, Juaaka Lyberth aamma Uju Petersen kiisalu ukioq kingulleq timersullammattut toqqagaasoq Patrick O. Frederiksen nersornaatinik tunniussisisuullutik.
Nuummi ukioq manna Timersortartut Ulloqartitsisoqarnerani inuit 500-t sinneqartut timersortartut pikkorissorsuit nersorniarneqarneranni najuupput. Takutitsilluarluni ajugaanernut kisiisa pillugit nersorinninniarneriinnaanngillat kisialli sukataarluni tunniussimalluni anguniagaqarnernut aamma nersorinninneruvoq, Kommuneqarfik Sermersuumi timersortartut taakku ilisarnaatigaat. Aaqqissuussinerup ingerlanerani Nipilersornermik ilinniarfiup nipilersoqatigiivi kiisalu bandi Avûna nipilersorlutik akunniliisarput.
Kommuneqarfik Sermersuup timersortartunik ulloqartitsilluni timersortartut timersoqatigiiffiillu kommunitsinnik inuummarissaaqataallutillu inuiaqatigiinnik eqeersimaartunik pilersitseqataasanerat pillugit ileqqoq malillugu nersorniarneqartarnerat ingerlateqqippaa.
Toqqagaasut:
Timersullammak: Jens-Frederik Nielsen
Iligiillammaat: NÛK futsal (arnat)
Sungiusaasuullammak: Mahmoud Minaei
Aqutsisuullammak: Jesper Labansen
Piukkunnaatilik: Vittu Olsen
Kajumissaat: Max Kreutzmann
