Kommuneqarfik Sermersuumit najukkami niuerneq tapersersorneqartarpoq, niuertunik oqaloqateqartarnerit annertusarneqarnissaat pingaartinneqarpoq, inuussutissarsiuteqartunit neqerooruteqartitsisarnerit eqqumaffigineqarnerunissaat kaammattuutigineqarpoq ammasumillu unammillernissaq kajumissaarutigineqarluni.
Ukiut tamaasa kommune suliassaqarfinni assigiinngitsorpassuarni neqeroortitsisarpoq, allaffimmi pequtinit, eqqiaaneq, qarasaasiaqarneq, bussit, usisaatilinnut allarpassuarnullu. Kommunimi pisiniarnermut politikkimi najukkami niuerneq pingaaruteqartutut ilaavoq, taamaattumillu ilaatigut Qarasaasiaqarfimmit aamma Neqerooruteqartitsinermut Isumaqatigiissutinullu Immikkoortortamit najukkami niuernissamut kissaateqartarneq tapersersorneqartarpoq.
”Ukiut tamaasa kommune amerlasuunik neqeroortitsisarpoq, najukkamilu pisiortortarfiit neqerooruteqarnissaannut tapersersussallugit assut pingaartittarparput. Qanimut oqaloqateqartarneq kiffartuussisarnerlu assut pingaaruteqarpoq, pingaaruteqarluinnarporlu najukkami inuussutissarsiortunik pitsaanerusumik oqaloqateqartarnissaq,” Carsten Jensen, Kommuneqarfik Sermersuumi Neqerooruteqartitsinermut Isumaqatigiissutinullu Immikkoortortami pisortaq oqaluttuarpoq.
Itisiliivorlu: ”Naak kommunimi niuertunik oqaloqateqartarnerit pingaartinneqarneruleraluartut inuussutissarsiortut siuttuullutik iliuuseqartarnissaat kaammattuutigaarput. Neqerooruteqartartutut neqeroortitsineq pingaarnertut kommunip neqeroortitsinermut nittartagaani saqqummiunneqartarneri eqqumaffigineqartartussaapput, neqerooruteqartartullu soorunami apeqqutissaqarpata saaffiginninnissaminnut tikilluaqqusaajuaannarput. Taamatuttaaq pisiortortarfigilerneqarsinnaasunik toqqaannartunik oqaloqateqarsinnaasarpugut nioqqutissanut kiffartuussinernullu tunngatillugu nutaaliatik takutikkusukkaangamikkit.”
Qarasaasialeriffik piareersimavoq
2023-mi oktobarip qaammataani kommunimi qarasaasiaqarfik, Qarasaasiaqarfimmi pisortap Kuluk Heilmann-Larsenip maanna siuttuuffigisaa, ammarpoq. Kuluup qarasaasiaqarnermut tunngasunik neqeroortitsisarnermut tunngatillugu unammillerneq annertusarneqarnissaannut piviusunut nutaanut sunneeqataanissaminut piareersimalluinnarpoq.
Qarasaasiaqarnermut tunngasut qanoq ineriartortinneqassanersut Kulummit ersarissarneqarput: ”Qarasaasiaqarnermut tunngasut eqqarsaatigalugit siunissami najukkami uummaarissumik unammillersinnaasumillu iliuuseqarsinnaaneq pingaartissavarput, saniatigullu, niuertunik oqaloqatigittarnernut pitsaanerulersitsisussanik, neqeroortitsisarnermut isiginnittariaatsit nutaat atuutilersissavagut. Taamaalilluni kommunimi ullumikkumiit pitsaanerusumik piareersaateqartarluta neqeroortitsisarnerit ingerlanneqartalissapput, tassanilu pisiortortarfiit ilisimasaat atorluarneqarnissaat pingaaruteqarpoq. Qarasaasiaqarnermut tunngatillugu nutaarluinnarnik, neqeroortitsisarnermut atuutilersussat ilaattut, malittarisassaqalissaaq”.
Innuttaasunut iluaqutaasussamik neqeroortitsisarneq
Kommunip atuisarneranni isumatusaartarnerup pingaaruteqassusia Carsten Jensenimit itisilerneqarpoq: ”Kommuneqarfik Sermersuumit, Kalaallit Nunaani kommunitut allatut, Kalaallit Nunaanni neqeroortitsisarnermut inatsit malinneqartussaavoq. Neqeroortitsisartussaavugut, taakkulu tunngavigalugit isumaqatigiissutaasut malillugit. Tamannalu soorunami kommunimi pisiniarnermut politikkimi tunngaviit ilagaat.”
Naggasiilluni: ”Taamaattorli pisiniarnermut politikkimi neqeroortitsisarnermi aningaasaqarneq tamarmiusoq suli pingaartinneqarnissaa, taamalu isumatusaartumik pisiniartarnissarput qulakkeerneqartassasoq erseqqissaatigineqarpoq. Ukiumut immikkoortuni assigiinngilluinnartuni 400 MIO. koruuninut pisiniartarnerput innuttaasunut akisussaaffigaarput. Najukkami pisiniartarnermi aningaasat atorneqartartut suli siuariartuutaanissaat naleqarnerulersitsinerunissaallu pingaaruteqarpoq. Naggasiullugu erseqqissaatigineqassaaq, piujuartitsisumik pisiniartarneq aaqqiissuteqartarnerlu kommunimi pisiniartarnermut tunngatillugu pingaarnerpaajusoq”