Kommuneqarfik Sermersooq maannakkorpiaq Kommune Qeqertalimmi innuttaasut MitID-mut ikaarsaariarneranni sulisunut ikiuuppoq.
Kommune Qeqertalik MitID-mut isertarfimmut suli attavilerneqanngimmat, innuttaasui MitID-mik peqalernissaminnut ikiorneqarsinnaanngillat. Taamaattumik Nuummi Innuttaasunik Kiffartuussivik Kommune Qeqertalimmi innuttaasut Qeqertarsuarmiittut ikiorumallugit neqerooruteqarpoq.
Atuuffik ”Lokal medarbejder” ikiorsiullugu sulisoq Qeqertarsuarmiittoq Kommuneqarfik Sermersuup MitID-mut sulisuisa allattorsimaffiannut ilanngunneqarpoq. Aasiaat inoqarfiillu allat attavilersuinermut ilanngutsinnissaat pilersaarutaavortaaq.
Kommuneqarfik Sermersuumi Innuttaasunik Kiffartuussivimmi pisortaq, Lone Rosengreen Pedersen, tassunga atatillugu ima oqarpoq:
”Uagutsinnut Kommunitsinni MitID-mik tunniussinissamut piginnaatinneqartunut, innuttaasunut suli MitID-mut attavilerneqanngitsunut, tunniussinermi ikiuunnissarput pissusissamisoorluinnartuuvoq. Siullertut sulisunut Qeqertarsuarmiittunut systemimi pilersitsivugut. Periuseq unaavoq, Qeqertarsuarmi innuttaasunik Kiffartuussiviup Kommuneqarfik Sermersuumi innuttaasunik Kiffartuussivimmi pisortaq piffissamik isumaqatigiissuteqarfigissavaa, kingornalu sulisumik tunniussinissamut piginnaatinneqartumit ikiorneqassallutik.”
Nangilluni oqarpoq: ”Soorunami isumalluutit atorsinnaasat tunniukkusuppavut, suliniut MitID ataatsimoorullugu atuutsikkiartuaagassaagami, ataatsimoorussamillu suliniuteqaraanni, nunatsinni sumiikkaluaraanniluunniit innuttaasoq siulliunneqartussaammat ataatsimut kivitsisuussaagut.”