Kommuneqarfik Sermersuumit Ilungersuussilluartut sisamat, illoqarfinni assigiinngitsuneersut inuiaqatigiinnut immikkuullarissumik tunniussisimanerat pillugu marlunngormat persuarsiutigineqarput. Akissarsititsinerit Kommunalbestyrelsip ataatsimiittarfiani, Paamiuni Ittoqqortoormiinilu kommunip allaffianni persuarsiorpalaartumik ingerlanneqarput. Persuarsiornermi ilaquttat ikinngutillu nersornaaserneqartut peqatiginissaannut qaaqquneqarsimapput.
Kommuneqarfik Sermersooq ukiut tamaasa Ilungersuussilluartunik toqqaasarpoq, ukioq manna aamma taanna pivoq. Ilungersuussilluartut sisamat illoqarfinni assigiinngitsuneersut ukioq manna nersorniarneqarput, taakkulu ilaatigut Nuummi Kommunalbestyrelsip ataatsimiittarfiani persuarsiutigineqarput.
Andreas Geisler Paamiuneersoq nersornaaserneqarpoq Taekwon-do-mi meeqqanik inuusuttunillu sungiusaasarnermik annertuumik suliaqarnini pillugu. Sungiusarneq Paamiuni meerarpassuarnut sapaatip akunneranut pisuni pingaarnerpaasarpoq, Taekwon-do aqqutigalugu timersornermik, imminut tatiginermik ataatsimoornermillu angusaqartartunik. Andreas timersornermini takutitsisarnermi saniatigut pitsaaliuinermi sulinermut annertuumik tunniussaqartuuvoq Paamiunilu tamanit ataqqineqarluarluni. Aqqutissiuussilluarsimaneratigut angajoqqaat amerlasuut meeqqat pitsaasumik ineriartornerat qujamasuutigaat.
Kristian Hammeken Ittoqqortoormiineersoq sunngiffini tamangajaat atorlugu Ittoqqortoormiit inuusuttuarartai arsarnermut sungiusartarpai, ukioq kaajallallugu tunniusimaffigalugu. Arsarnermut tunniusimanerata inuusuttuararpassuit pikkorinnerulernissaannut, peqqinnerulernissaannut, imminut tatiginerulernissaannut minnerunngitsumillu nuannisarnissaannut periarfissittarpai.
Thomas Kristensen Tasiilameersup nersorniarneqarnera suliamut ataasiinnarmut tunnganngilaq, Tasiilamili assigiinngitsorpassuarnut tunngasuni sunniuteqarluarsimaneranut tunngalluni. Thomas ukiuni amerlasuuni Tasiilami eqqagassalerinermut tunngasunik ingerlatsisuusimavoq, pingaarutilik amerlasuutigullu inuiaqatigiinni isiginiarneqanngitsoortartoq. Inuussutissarsiornermut Siunnersuisooqatigiinni siulittaasutut inuussutissarsiortut sinnerlugit kommunimut Namminersorlutillu Oqartussanut oqaloqatiginnittuusarpoq. Thomas ataatsimuussusermut pitsaanerulersitseqataavoq, Tasiilarlu kinguaariinni tamani najugaqarfikkuminartuulersitseqataaffigalugu.
Rosannguaq Rossenip Nuummeersup suliniuteqarneratigut Nunatsinni aliasuuteqarneq pillugu sulinngiffeqartarnerup sivitsorneqarnissaa inuiaqatigiinni oqallisigineqalerpoq. Ernermi Emilip annaareernerata kingorna, Rosannguaq aliasuuteqarneq pillugu sulinngiffeqartarnerup pingaaruteqassusaata ersersinneratigut politikikkullu oqallitsitsilernikkut allannguisoqarnissaa anguniassallugu aalajangerpoq. Rosannguup nukittunera pimoorussineralu inuppassuarnut isummersuivoq. Rosannguup takutippaa aliasuffimmi neriuummik allannguinermillu pilersitsisoqarsinnaasoq. Suliniuteqarneralu innuttaasunik amerlasuunik attuivoq allanngueqataasinnaallunilu.
Ilungersuussilluartut sisamaasut takutippaat, inuttut ataasiakkaatut iliuseqarnermi aammalu pimoorussineq inuiaqatigiinnut annertuumik ataavartumillu sunniuteqarsinnaasoq. Taakku tunniussaat inuppalaassusermut inuiaqatigiinnilu akisussaaqataanermut assersuutaalluarput.
