Ullumikkut Naalagaaffeqatigiiffik tamarmi nutaamik kunngitaarpoq. Ukiut 52-it Ataqqinartorsuaq Dronning Margrethe 2 Dronningioreersoq maanna Kunngi tassaalerpoq Ataqqinartorsuaq Kunngi Frederik 10.
Tassunga atatillugu Kommuneqarfik Sermersuumi borgmesteri Avaaraq Olsen dronningimut tunuartumut qujaniarpoq kunnginngortorlu pilluaqqullugu.
“Dronning Margrethep nunatsinnut innuttaasutsinnullu soqutiginninnerujussua ilisimasaqassusaalu nuannaarutigiuaannarsimavakka” Kalaallit ataqqillugit paasinniffigalugillu naapittuaannarpai assinganillu pineqartuaannarpoq,” Avaaraq Olsen oqarpoq.
Taamatuttaaq Borgmesterip kunngikkunngortussat taakkualu Kalaallit Nunaanni siunissami atuuffeqarnissaat qilanaarivai.
”Kunnginngortoq qujanartumik aamma anaanamisulli Kalaallit Nunaannut asannittuuvoq attaveqarluartuullunilu. Pisortatigoortumik tikeraarluni aammali ikinngutini tikeraarlugit imaluunniit nunatsinni pinngortitaq aliannaarsaarfigalugu piffissaq annertooq atornikuuaa. Qularinngilluinnarpara Frederik 10. Kalaallit Nunaannut kunngiulluarumaartoq Kommuneqarfik Sermersooq tamaat sinnerlugu kunngikkunngortut pilluaqqorujussuarpakka,” Avaaraq Olsen oqarpoq.