Kommuneqarfik Sermersuumi borgmesteri, Avaaraq Olsen, isumaqarpoq, aalisarneq pillugu inatsisissap tusarniaassutigineqarnera sivikippallaartoq kommunimut innuttaasunullu suliarilluakkamik akissuteqarfigineqarnissaanut periarfissiisoqassappat. Taamaammat Aalisarnermut Piniarnermullu Naalakkersuisoqarfimmut pisortatigoortumik piumasaqarluni maannakkut tusarniaanerup ingerlanneqartup sivitsorneqarnissaa saaffiginnissutigaa.
“Inatsit, toqqaannartumik innuttaasutsinnut amerlasuunut nunattalu aningaasaqarneranut annertuunik kinguneqartussaq pineqarpoq. Pingaaruteqarluinnartuuvoq, kikkut tamarmik naammattumik piffissaqarlutik siunnersuummik nalilersuinissaat qisuariarnissaallu,” borgmesteri Avaaraq Olsen oqarpoq.
Maannakkut piffissaq tusarniaaffiusoq novembarip ulluisa 29-anni 2023 aallartittoq, piffissami inuppassuarnut nalliuttut ilaquttanullu pisussaaffiit nalerorpaa. Borgmesterip oqaatigaa, tamanna inatsisissap sukumiisumik misissornissaanut killilimmik periarfissaqartitsisoq. “Juulli ukiortaarlu ileqquusoq malillugu ilaqutariit pingaarnerutillugit ingerlanneqartarput. Maani Piniarnermut Aalisarnermullu Siunnersuisooqatigiit piffissami tamatumani suliassaqarfimmik taamak annertutigisumik sukumiisumik suliaqarnissaannik periarfissinneqarnissaat sakkortuallaarpoq,” Avaaraq Olsen oqarpoq