Piffissami kingullermi Nuummi inuusuttoqatigiit unnuakkut aqqusinermi angalaartartut ajornartorsiutaapput. Tassani pineqarput meeqqat arfineq pingasut tungaannut ukiullit, ajoraluartumik nakuusertartut aserorterisarlutillu.
Unnuakkut eqqissiviilliornerup annertusiartornera iliuuseqarfiginiarlugu Kommuneqarfik Sermersooq politiinit kajumissaarineq aallaavigalugu aalajangerpoq novembarip qaammataani toqqissisimaneq pillugu angalaartartut amerliniarlugit.
Angalaartartut aappai piffissami nalinginnaasumi 20:00-miit 02:00-mut angalaartarput, aappaalu 22:00-miit 04:00-mut angalaartarlutik.
Toqqissisimaneq pillugu angalaartartut 2021-mi pilersinneqartut takussaasuunertik aqqutigalugu Nuummi aqqusinermi eqqissiviilliornernik pinerlunnernillu pinaveersaartitsineq pingaarnertut suliaraat. Angalaartartut meeqqanik unnuami aqqusinermiittartunik oqaloqateqartarput, ikiuisinnaasunut innersuuttarpaat angerlaannissaannulluunniit neqeroorfigisarlugit.
“Nuannerpoq takullugu sulisuvut tunniusimasut meerartatsinnut inuusuttatsinnillu ajornartorsiortunut ornigunnissaminnut paarsinissaminnullu piffissap sivikitsup iluani piareeqqasarmata”, Meeqqanut, Ilaqutariinnut Atuarfeqarnermullu Ataatsimiititami siulittaasoq Poul Petersen oqarpoq.
Decembarimi suliniut ingerlalluaqaaq angalaartartullu aappaat suli aqqusinermi takussaalinngillat. Taamaattoq Kommuneqarfik Sermersooq piareeqqavoq meeqqat juullikkunni atuanngiffeqaliinnartut aqqusinermi angalaartitsilernissamut, taamaattumillu piffissaqarnerussallutik.