Tasiilap qeqqani Tasiilami Alivarpi, illoqarfimmi meeqqat atuarfiat aamma Ammassallip Katersugaasivia immikkuullarissumik suleqatigiillutik isumassarsiorluarfiusunik eqqumiitsulianik saqqummersitsipput.
8., 9., aamma 10. klassimi atuartut titartagaannik saqqummersitsisoqarpoq. Ammaanersiorluni saqqummersitsineq nalliuttorsiutigineqarpoq, orniguttullu 50-it missaanniillutik, atuartut ilinniartitsisullu ilanngullugit. Eqqumiitsuliat Tunumi inuunermik allaanerusumik takutitsipput. Piffissami Tasiilap ajornartorsiuteqarfiusutut nutaarsiassaniikulaffigisaani “Nunarnga Kangia”-nik saqqummersitsineq tunumi inuunerup pitsaasortaanik takutitsivoq.
Atuartut eqqumiitsuliaanni angerlarsimaffimminnut asanninnerat atassuteqarnerallu takutinneqarpoq. Titartakkat tamarmik inuusuttut inooriaatsiminni najukkaminillu naleqartitsinerat nersorinninnerallu takutippaat. Oqaluttuat assiliartaqartuusut Tunumi peroriartornerup qanoq isumaqarneranik takutitsipput.
Saqqummersitsineq 2024-mi februaarip ulluisa 15-iata tungaanut ingerlanneqartussaq Tasiilami assinik katersugaasivimmi nanineqarsinnaavoq. Marlunngornerit sisamanngornerillu tamaasa nal. 13.00-miit 16.00-mut katersugaasivik alakkarneqarsinnaavoq. Taassuma saniatigut saqqummersitap angalaartitanngornissaa sulissutigineqarpoq taamaalilluni amerlanerit eqqumiitsuliat takusinnaassavaat Tunumullu tunngatillugu nutaamik isiginnittaaseqalersinnaallutik, isiginnittaaseq neriuuteqarfiusoq, tulluusimaarfiusoq kusarnarluinnartorlu amerlanerusunit misigineqarsinnaalissammat.
“Nunarnga Kangia” aqqutigalugu inuiaqatigiinni unamminiagassaqartoqaraluarpalluunniit tamatigut kusarnarluinnartut, pilersitsinerit oqaluttuallu pitsaasut inissaqartuassasut eqqaasinneqassaagut. Atuartut titartagaat eqqumiitsuliaannaanngillat; Tunumilu kinguaariit inuusuttut neriuuteqarnerannik tulluusimaaruteqarneranillu oqariartortuupput.
