Ulloq unnuarlu paaqqinnittarfinni pinartumik inissiivissanik amigaateqartoqarnera pissutigalugu Kommuneqarfik Sermersooq Nuuk Outdoor-imut inissiivoq naak taanna ulloq unnuarlugu paaqqinniffittut pisortatigoortumik akuerisaanngikkaluartoq. Aasarli Kommuneqarfik Sermersooq aamma Isumaginninnermik Aqutsisoqarfik qanimut oqaloqatigiipput, meeqqat inuusuttullu atugarliortut pitsaasunik aalajangersimasunillu atugassaqartinneqarnissaat pillugu.
‘Suliniuteqarluni inissiinerit nalinginnaasumik atussallugit ornigisarinngilarput. Nakkutilliinitta neqeroorutip amigaateqarnera takutimmagu, taanna atorunnaarsikkiartorneqassasoq aalajangerpugut,’ Frederik Lundblad, Kommuneqarfik Sermersuumi Meeqqanut Ilaqutariinnullu ingerlatsivimmi pisortaq oqarpoq.
Aasamiit maannamut meeqqat suliniuteqarluni Kommuneqarfik Sermersuumi inissinneqartut 17-iniit 6-inut ikileriarput. Tamanna Isumaginninnermik Aqutsisoqarfik qanimut suleqatigalugu pivoq, taanna innersuussisarnermut ataatsimut atortoq aqqutigalugu inissiivissanik naleqquttunik ujaasisimavoq.
Meeqqanut taakkununnga 6-inut, suliniuteqarluni inissikkallarneqartunut, pilersaarusiortoqareerpoq, taamaattumillu Kommuneqarfik Sermersuumiit suliniuteqarluni inissiinerit atorunnaarsikkiartuaarsinneqarnissaa naatsorsuutigineqarpoq. Meeqqanut, inuttut atukkat pissutigalugit angerlarsimasinnaanngikkallartunut, taakkununnga inissiiviugallarsinnaasunik ajornartorsiuteqarnerput suli anigorneqanngilaq. Ajornartorsiutigineqartut taakku Sermersuumit Isumaginninnermik Aqutsisoqarfik peqatigalugu misissorneqarput. Ajornartorsiutilli taakku ullormiit ullormut aaqqiivigineqarsinnaanngillat.
‘Inissiisarnermut tunngasunik ajornartorsiuteqarneq ajornakusoortuuvoq, taamaattumillu aaqqiissutissat pitsaanerpaat nassaariniarlugit suleqatigiissutigineqartariaqarput. Isumaginninnermik Aqutsisoqarfik innersuussisarnermik suliaqarnermut qitiusumik inissisimavoq, taamaattumillu aqutsisoqarfiup kommunillu akornanni oqaloqatigiinneq suleqatigiinnerlu assut pingaaruteqarluinnarpoq,’ Tina Evaldsen, Isumaginninnermik Aqutsisoqarfimmi pisortaq, oqarpoq.