Kommuneqarfik Sermersuumi kommunalbestyrelsip tamarmiulluni 2024-mut missingersuutit pillugit isumaqatigiissut Inuit Ataqatigiit, Demokraatit, Siumut, Naleqqap attaviitsullu Storm Ludvigsenip akornanni oqaluttuarisaanikkut pingaarutilimmik suleqatigiinnikkut akuersissutigaat. Isumaqatigiissut kommunimi siunissamut aalajaatsumik piujuartitsisumillu ineriartortitsinissamut tunngaviussaaq.
2024-mut missingersuutit pillugit isumaqatigiissut, pilersaarusiornermut ineriartortitsinermullu kommunalbestyrelsip ukiuni kingullerni sulissutigisimasaanut ingerlatitseqqiineruvoq. Kommunip ingerlatsineranik kiffartuussissutaanillu sukumiisumik nalilersuinerup ukiup ataatsip ingerlanerani ingerlanneqareernerani Kommuneqarfik Sermersuumi innuttaasunut kiffartuussissutit pingaarutillit pitsanngorsarneqarnissaannut massakkut patajaatsumik pilersaarusiortoqarpoq.
Isumaqatigiissut ilaqutariit tamarmik eqqortumik piginnaasaqarfiusumillu ikiorserneqarsinnaanissaannik, meeqqat toqqissisimallutik ulluunerani paaqqinnittarfinnukaanneqarsinnaanissaannik kiisalu innuttaasut utoqqaat naleqartitaallutik utoqqalisinnaanissaannik qulakkeerinninnissamik ataatsimut paasinneqatigiinnermik tunngaveqarpoq. Taamatuttaaq kommunip kiffartuussinerani piffissaliussisoqartassaaq, pitsaasumik innuttaasunillu pingaartitsisumik qulakkeerisumik.
Nuuk pillugu illoqarfiit pingaarnersaannut nutaamik periusissaliorneq missingersuutit pillugit isumaqatigiissummi suliniutit ilagaat. Periusissiaq innuttaasut najukkamilu soqutiginnittut qanimut suleqatigalugit suliarineqassaaq, taannalu Nuummut pitsaasumik ineriartortitsinissamut pilersitseqataassaaq.
Missingersuutit pillugit isumaqatigiissut aamma inuusuttunut utoqqarnullu atugassarititanik aamma sukumiisumik ukkatarinniffiuvoq. Meeqqat amerligaluttuinnartut angerlarsimaffiup avataanut inissinneqartartut amerliartuaarnerisa allanngortinneqarnissaanut nutaanik suliniuteqartoqassaaq angajoqqaarsianillu kajumilersitsinissamik tapersersuinermillu sulissuteqartoqassalluni. Utoqqarnut isumaqatigiissut inissianik utoqqarnut naleqqussakkanik utoqqaallu illuini inissanik annermik puigortunngortunit pisariaqartinneqartunik ineriartortitsinerup ingerlaannarnissaanik qulakkeerinnissaaq.
Pilersaarummut tamatumunnga ilassutitut Paamiut, Tasiilaq Ittoqqortoormiillu ukiuni tulliuttuni immikkut ukkatarineqassapput. Najukkami inuiaqatigiit attaveqaatersuutinik pitsanngorsaanikkut kommunimilu kiffartuussissutinik pissarsinissamik ajornannginnerulersitsinikkut pitsanngorsarneqarnissaq ukkatarineqassalluni. Tamanna illoqarfinni nutaanik periarfissiisussamik inooqatigiinnermilu ataqatigiissutsimik nukittorsaasussamik najukkami kulturimut sunngiffimmilu atortunut aningaasaliisoqarnissaanik ilaqarpoq.
Partiit oqaaseqaataat:
Avaaraq Olsen, Borgmesteri, Inuit Ataqatigiit
Borgmesteri Avaaraq Olsen Inuit Ataqatigiinneersoq 2024-mut missingersuutit pillugit isumaqatigiissummut tunngatillugu siammasissumik suleqatigiittoqarneranik nuannaarutiginnippoq. “Ataatsimoorluta Kommuneqarfik Sermersuumi siunissami ineriartornissamut pitsaasumik tunngaviliisinnaanerput nuannaarutigeqaarput. Isumaqatigiissut ataatsimooraangatta innuttaasunut tamanut siunissamik pitsaasumik piujuartitsiffiusumillu pilersitsisinnaanitsinnut uppernarsaataavoq.”
Juaaka Lyberth, Gruppimi siulittaasoq, Inuit Ataqatigiit
Gruppimi siulittaasoq Juaaka Lyberth Inuit Ataqatigiinneersoq 2024-mut missingersuutit pillugit isumaqatigiissummi piniarnermut aalisarnermullu tunngasut, illoqarfiit nunaqarfiillu naligiinnerat kiisalu illoqarfiit pingaarnersaannut nutaamik periusissaliornerup pingaaruteqassusaanik erseqqissaavoq. “Inuit Ataqatigiinniit nuannaarutigaarput missingersuummut isumaqatiginninniarneq pitsaasoq ingerlanneqarmat, ukiorpassuit ingerlaneranni pitsaanerpaatut taaneqarsinnaasoq. Atugarissaarneq kommunillu suliassai pingaarnerit pingaartissimavagut, illoqarfiillu nunaqarfiillu naligiisinneqarniarnerisa aqqani sullissinermi akigititat apparneqarput. Assersuutigalugu sumiiffinni eqqakkat aqquteqarfeqanngitsuni anartarfilerinernut akigitinneqartut affaannanngortinneqarput aammalu nunaqarfinni illut sulliviit akikinnerulersinneqarlutik. Taakku saniatigut ukkatarilluarsimavarput sinerissap qanittuani piniarneq aalisarnerlu inerisarneqarnissaat. Illoqarfiit pingaarnersaannut periusissaq Nuummut Kommuneqarfik Sermersoorlu tamakkerlugu takorluukkatsinnut aalajangiisuulluinnartoq aamma immikkut taarusuppara.”
Dorthe-Marie Mogensen-Fontain, Gruppimi siulittaasoq, Siumut
Gruppimi siulittaasup Dorthe-Marie Mogensen-Fontainip Siumumeersup suliniutit missingersuutit pillugit isumaqatigiissummiittut, Tasiilamut, Paamiunut Ittoqqortoormiinullu ukkatarinnittut qilanaarai. “Ukiumut matumunnga missingersuutini illoqarfinnut minnerusunit pilersaarutit aalajangersimasut assut naammagisimaarpagut. Tamanna ineriartornerup illoqarfiit pingaarnersaannik taamaallaat ukkatarinninnani, kommunitsinni nunap immikkoortortaasa tamarmik kivinneqarnissaannik qulakkeerinnissaaq. Siumumiit aamma nuannaarutigaarput illoqarfiit pingaarnissaanni inissiat tamanit najugarineqarsinnaasut sanaartorniarneqarneri. Ingammik utoqqaat illuini utoqqarnut qanimut sullissisut inissianik tunineqarsinnaanissaat periarfissineqartariaqarnerat eqqarsaatigalugu.”
Ken Madsen, borgmesterip tulliata aappaa, Naleraq
Ken Madsen, borgmesterip tulliata aappaa Naleqqamilu gruppimut siulittaasoq, missingersuutit pillugit isumaqatigiissummi nutaami nunaqarfinnut suliniutinik pingaarutilinnik tikkuaavoq. “Kommunip ineriartornerani nunaqarfitta immikkuullarissumik atuuffeqarnerisa nukittorsarnissaat pingaaruteqarpoq. Suliniutit, missingersuummi uani qulakkiikkavut, sakkussanik, nunaqarfiit ineriartornissaannut ingerlalluarnissaannullu pisariaqartitatsinnik tunisissapput. Tamatuma inuiaqatigiitsinni minnerit katataanatik siuariartoqatigiinnitsinnut peqataanissaat qulakkiissavaa.”
Justus Hansen, Borgmesterip tullia siulleq, Demokraatit
Justus Hansenip, borgmesterip tulliata siulliup Demokraatinullu gruppimi siulittaasup, inuussutissarsiornermik ineriartortitsinerup 2024-mut missingersuutit pillugit isumaqatigiissummi pingaaruteqarluinnartumik inissisimanera erseqqissarpaa. “Inuussutissarsiornerup pitsaasuullunilu unammilleqatigiiffiusinnaanissaa sulissutigalugu ingerlateqqissavarput. Missingersuutit pillugit isumaqatigiissummi uani suliffeqarfinnut najoqqutassat pitsaanerpaatinnissaannut pisussaaffilerpugut, tamatuma ineriartorneq siuarsassavaa kiisalu Kommuneqarfik Sermersuup aningaasaliiffissatut orniginartutut ullumikkut siunissamilu inissisimanissaa qulakkiissallugu.”
Storm Ludvigsen, Attaviitsoq
Storm Ludvigsenip, kommunalbestyrelsimi attaviitsup 2024-mut missingersuutit pillugit isumaqatigiissummi inuuniarnermikkut ajornartorsiutillit qitiutippai. “Missingersuutini pingaarnersiuinitsinni inuiaqatigiitsinni inuuniarnermikkut ajornartorsiutillit puiunnginnissaat pingaaruteqarpoq. Missingersuutit pillugit isumaqatigiissutip matuma, sulisut kiffartuussissutillu pingaarutillit pissarsiarineqarsinnaanerinik qulakkeerinninnikkut, akornatsinni sanngiinnersatsinnut tapersersuinissatsinnut pisussaaffilertugut takutippaa.”