Borgmester Avaaraq Olsen aamma kommunaldirektør Ole Jakobsen 2023-mi oktobarimi Arctic Circle Assemblymi Reykjavikimi pisumi peqataapput – Nunani issittuni ilisimasanik avitseqatigiiffiusumik oqaloqatigiittarfiusoq.
Arctic Circle Assembly ukiumoortumik pisarpoq, Nunat Issittormiut siunissaannut tunngasumik pingaarnertut imaqartartoq aamma Nunani issittormiuni ajornartorsiutit periarfissallu itisiliisumik oqallisigineqartarlutik. Arctic Circle Assembly (ACA) tassaavoq Issittup siunissaa pillugu nunat tamalaat akornanni oqaloqatigiinnerit suleqatigiinnerillu attaveqaataat annerpaaq. Tassani ilaatigut aalajangiisartut, ilisimatuut suliffeqarfinnilu aqutsisut ilisimasanik isummanillu avitseqatigiinniarlutik peqataapput.
Borgmesterip tikeraarnermini Arctic Mayors Forum (AMF) peqataaffigilluarpaa, nunani issittuni borgmesterit akunnerminni naapeqatigiillutik oqaloqatigiittarfiat. Arctic Circle Assembly ingerlanneqarnerani qulequttat attuumassuteqarfigisatik oqalliseqataaffiginissaannut periarfissaqarsimapput, soorlu najukkami attaveqaqatigiinnermut tunngasuni ajornartorsiuteqartarneq, taamatullu nunani issittuni borgmesterit akunnerminni suleqatigiinnerulernissaq siunertaralugu periusissaliornissamut ataatsimeeqatigiinnermi peqataallutik. Borgmesterip angalanermini Tromsø kommunip borgmesteria Gunnar Wilhelmsen peqatigalugu pingaartorsiornermi peqataavoq, tassa Ilisimatusarfiup aamma UiT The Arctic University of Norway akornanni suleqatigiinnissamik isumaqatigiissutaannik nutarterlugu atsioqatigiinneranni.
Borgmesterip kommunaldirektørillu Reykjavikimiinnertik iluatsillugu Reykjavikimi kommunip meeqqeriveqarfimmut tunngasunik suliallit ataatsimeeqatigaat. Ataatsimiinnermi meeqqat nutaaliorsinnaassusiannik ineriartortitsinermi aamma angajoqqaanik attaveqatigiittarnermi teknologi nutaaliaasoq qanoq atorneqarnersoq paasisaqarfigaat.
Reykjavikimiinneq nunanik issittumiittunik allanik attaveqarnerup pitsanngorsarnissaanut misilittakkanillu avitseqateqarfiginissaannut Kommuneqarfik Sermersuumi suleriaqqinnissamut iluaqutaavoq.
