Nuummi Naluttarfik Malik ukiuni 20-nngortorsiortinneqaqqammerpoq, sulilu nutaatut isikkoqaraluarluni sukkut tamaana nungullariartulersimavoq. Naluttarfik annertuumik nutarterneqartussanngorpoq, tassuuna atorfissaminut tamakkiisumik ingerlatsiinnartoqarsinnaanissaa qulakkeerusullugu.
Kommuneqarfik Sermersuumi sanaartornermi chefi Rudi Birkedal naapertorlugu, naluttarfimmi atuisunut siunnersuisooqatigiit siunnerfilimmik oqaloqatigineqallattaalereerput.
Kommuneqarfik Sermersuumi sanaartornermi chefip Rudi Birkedalip oqaluttuaraa, nutarterinissamut pilersaarusiorneq maannakkut ingerlanneqaleruttortoq naatsorsuutigineqarlunilu pilersaarut pillugu entreprenørinut neqeroortitsineq 2024-mi apriilimi ingerlanneqassasoq. Suliaqarnertaa aallartinneqarpat naammassineqarnissaanut qaammatit 10 – 12-it missaanik sivisussuseqassasoq naatsorsuutigineqarpoq. Tamatuma kingunerisaanik naluttarfiup nutarterneqarnerata nalaani matoqqassaaq.
Naluttarfimmi atuisunut siunnersuisooqatigiit ilisimatinneqallattaasassapput aamma nutarterinermi pilersaarusiornermi peqataatinneqassapput.
Nutarterinerup aallartinneqarnissaanut ullussaa suli aalajangiunneqanngilaq, naatsorsuutigineqarlunili pilersaarut 2024-mi 2025-miluunniit aallartinneqassasoq.