Kommuneqarfik Sermersuumi Borgmesteri, Avaaraq Olsen, Peqqinnissamullu Naalakkersuisoq Agathe Fontain ullumi isumaqatigiissummik atsiorput, isumaqatigiissuteqartut kommunip illoqarfiini minnerusuni innuttaasunik sullissinermi suleqatigiinnissamik pisussaaffilerneqarput. Alloriarneq Tasiilami Ittoqqortoormiinilu peqqissaanermut utoqqarnillu paaqqutarinninnermut tunngasunik nutaanik sanaartornissamut aqqutissiuussivoq.
Kommuneqarfik Sermersuumi Kommunalbestyrelsi peqqissaanermut utoqqarnillu paaqqutarinninnermut tunngasuni nutaanik illuliornissamut tunngaviusumik aalajangerpoq.
Pilersaarutit amerlasuut ilagaat Tasiilami utoqqaat illuat nutaaq, Ittoqqortoormiinilu utoqqarnut najugaqatigiiffimmik alliliineq. Paaqqutarinninnermi illut nutaat illoqarfinni peqqinnissaqarfiup illutaanut atassuserlugit sanaartorneqassapput. Tamanna utoqqarnik paaqqutarinninnerup peqqinnissaqarfiullu qaninnerusumik suleqatigiinnerannik siuarsaataassaaq taamaasilluni innuttaasunut sullissinermik pitsaanerulersitsilluni.
Suleqatigiinnerup pitsaasumik sunniutaa alla tassaavoq sulisut peqqinnissaqarfimmi utoqqarnillu paaqqutaqarnermik sulisinnaammata. Ullumikkut Kalaallit Nunaat tamakkerlugu peqqissaanermi sulisunik atorfinitsitsinissaq ajornarpoq pingaartumik illoqarfinni minnerusuni. Ajornartorsiutip annertunerulernissaa naatsorsuutigineqarpoq pissutigalugu utoqqarnut suliassaqarfimmi atorfillit 33%-ii ukiut 12-it iluani soraarninngussammata. Taamaattumik tiimit suliffigisassat atorluarnerunissaanut pitsanngorsaanissaq pisariaqarpoq.
Borgmesterip Avaaraq Olsenip Naalakkersuisunik suleqateqarneq nuannaarutigaa. “Una isumaqatigiissut utoqqartatta innuttaasuttalu napparsimasut inuunerminni nalerisimalernissaanut alloriarneruvoq pingaaruteqartorujussuaq peqatigitillugulu illoqarfinni minnerusuni siunissami sullissineq qulakkeerlutigu” Avaaraq Olsen oqarpoq.
Peqqissutsimut Naalakkersuisoq Agathe Fontain oqarpoq: “Pingaaruteqarluinnarpoq pisortat suliffeqarfiutaasa akornanni suleqatigiinnerit nukittorsartuarnissaat. Kommunip Peqqinnissaqarfiullu suleqatigiinnerat isumalerujussuaq, innuttaasunut iluaqutaasussaq assersuutissaqippoq matumani isumaqatigiissummi nutaami.
Kommuneqarfik Sermersuumi Paamiuni peqqinnissaqarfik qanimut suleqatigilereerpaat innuttaasunullu pitsaanerusumik sullissinermik kinguneqarluni.
Alloriarnerup tullerissavaa sanaartugassatut pilersaarutit ataasiakkaat politikkikkut akuersissutigineqarnissaat.
