Kommuneqarfik Sermersuumi Utoqqaat pillugit siunnersuisooqatigiit Suliffeqarnermut Isumaginninnermullu Ingerlatsivik suleqatigalugu kommunimi utoqqartaasunut misissuinermut atatillugu apeqqutinik nassiussipput.
“Utoqqaat pillugit siunnersuisooqatigiit Suliffeqarnermut Isumaginninnermullu Ataatsimiititamik 2022-mi decembarimi ataatsimeeqateqarnerminni siunnersuutigaat, utoqqaat atugaat pillugit misissuinermik Kommuneqarfik Sermersooq siuuttuussasoq. Tassani siunertaassalluni utoqqaat qanoq issutsiminnik sunillu pisariaqartitaminnik oqaaseqarnissamut periarfissaqartinnissaat. Taamatut paasissutissaqalernermi kommunimi utoqqaat atugaannut tunngasunik aalajangiinissami tunngavissaqartoqalissammat. Utoqqaat pillugit siunnersuisooqatigiinni nuannaarutigaarput, siunnersuutigisarput kommunip tungaaniit tigulluarneqarmat. Neriuutigaarpullu apeqqutit utoqqarpassuarnit akineqarlutillu utertinneqarumaartut” Utoqqaat pillugit siunnersuisooqatigiinni siulittaasoq Marianne Jensen oqarpoq.
Apeqqutit kommunimi innuttaasunut 67-ileereersimasunut tamanut nassiunneqarput, akissutillu utoqqaat siuneqassutsikkut timikkullu peqqissusaannik, aningaasaqarnerannik inuunermilu qanoq atugaqarnerannik paasisimasaqarnerulernissamut iluaqutaassapput.
Suliffeqarnermut Isumaginninnermullu Ataatsimiititami siulittaasup Inge Olsvig Brandt-ip nuannaarutigaa, kommunimi Utoqqaat pillugit siunnersuisooqatigiit eqeersimaartuullutillu iliuuseqarusussuseqartuunerat, apeqqutillu atorlugit misissuinerup inernerata takusaqarfiginissaanut qilanaarluni. ”Utoqqaat pillugit siunnersuisooqatigiit misissuisoqarnissaanik isumassarsisimanerat nuannaarutigaarput, taannami politikkikkut siunissaq ungasinnerusoq eqqarsaatigalugu attanneqarsinnaasumillu aalajangiisarnissatsinnut ilisimasaqarluarnissamut tunngavileeqataassaaq. Apeqqutit atorlugit misissuinerup inernera siunissami suliassaqarfimmi pingaarnersiueriaasissatsinnut pitsanngorsaaqataassaaq”, Inge Olsvig Brandt oqarpoq.
Utoqqarnik sullissinermi chefi, Karen Lund Mølgaard, taamatulli nuannaarutigilluinnarpaa taamatut suliniuteqarniarneq, neriuutigalugulu suliassaqarfimmi suleqatinilu sulinissaminnut iluaqutaasinnaassasoq. ”Kissaatigaarput, kommune taannaassasoq, naleqassusermik, ataqqinassusermik inuunerissaartitsinissamillu pingaartitsiffiunermigut utoqqaliffigiuminartuusoq, tamannalumi pillugu kommunitut pitsaanerulernissarput sulissutigiuassavarput. Misissuisoqarneratigut paasisimasaqarnerulissaagut, taamaalillutalu siunissaq eqqarsaatigalugu anguniagalimmik suliniuteqarnissaq qulakkeerniassallugu”, Utoqqarnik sullissinermi chefi Karen Lund Mølgaard oqarpoq.
Suliffeqarnermut Isumaginninnermullu Ingerlatsivimmit ilisimatitsissutigineqarpoq, nammineq kajumissutsimik peqataanerussasoq, akissutillu tiguneqartut allanut saqqummiutinngilluinnarlugit suliarineqassasut. Apeqqutit pappiaranngorlugit allakkatigut nassiunneqareerput, taamaattumillu Kommuneqarfik Sermersuumi utoqqarnit tiguneqarnissaannut utaqqinarsinnaallutik.
