Tunumi takornarialerinermi suliaqartut nutaamik nittartagartaarput nunap immikkoortuata nittarsaanneqarnissaanissaanut atugassamik. Uani www.eastgreenland.com takornariat, takornariartitsisartut aammalu umiarsuarnik takornariartaatinik piginnittut siunissami paasissutissanik pisariaqartitaminnik aallersinnaalissapput tunumut tikeraarnissaminnik pilersaarusiorniarunik. Takornarialerinermi nittarsaassinermi suliffeqarfik (DMO) Visit East Greenland nittartakkamik nutaamik pilersitsisuuvoq nunap immikkoortuani atugassamik. 2022-mi Kommuneqarfik Sermersooq aalajangerpoq, takornarialerinermi ataqatigiissaarineq kommunip ilaaneeqqilissasoq. 2023-p aallartinnerani Tunumi takornarialerinermi ataqatigiissaarisoq kommunimi Inuussutissarsiornermut immikkoortortami atorfinitsinneqarpoq, Sermersooq Business, DMOp inissisimaffigisaani.
”Kikkulluunniit Tunumeereersimasut nalunngilaat misigisaq qanoq pikkunartigisoq. Qujanartumik Tasiilaq aamma Ittoqqortoormiit takornariarpassuarnit tikinneqartarput, soqutiginnittulli amerliartortikkusuppavut. Taamaattumik nutaamik nittartagaliorpugut, nunap immikkoortuanik nittarsaassiffiusussamik, nunarsuarlu tamakkerlugu periarfissarpassuit nittarsaakkumallugit, Kommuneqarfik Sermersuumi Inuussutissarsiornermi pisortaq Mads Daniel Skifte oqarpoq.
Nittartagaq ullumikkut Vestnorden Travel Market aaqqissuunneqarmat takuteqqaarneqarpoq, tassanilu nunarsuaq tamakkerlugu takornarialerinermik aaqqissuussisartut siullerpaajullutik takunneqqaartuupput. Illit nammineq nittartagaq ugguuna alakkarsinnaavat www.eastgreenland.com.
Tunumi takornariaqarneq siuariartorfiuvoq. Ukioq mannaannaq umiarsuit takornariartaatit 20-t Tasiilamut tikipput, taavalu Ittoqqortoormiit 49-nit tikeraarneqarlutik. Taamaattumik Kommuneqarfik Sermersuumi borgmesterip Avaaraq Olsenip nittartagaq pitsaasumik ineriartortoqarneranut sakkussatsialattut isigaa.
”Takornariaqarneq suliffissanik aammalu Tunumi illoqarfinni nunaqarfinnilu ineriartortitsinermut periarfissanik pissarsiffiusinnaavoq. Taamatut ineriartortoqarnera ikorfartueqataaffigerusupparput. Pingaartumik takornariat pitsaassuseqartunik misigisaqarumasut pilerilersinniarlugit, taakkuummatami najukkani aningaasanik atuisartut. Alloriarneq siulleq tassaavoq, takornariat Tunumi periarfissanik tamanik oqaluttuunnissaat. Taamaammat nuannaarutigeqaara nittartagaq maanna tamanut ammaanneqarmat,” borgmesteri Avaaraq Olsen oqarpoq.