Marlunngornermi oktobarip ulluisa 17-ianni Kommuneqarfik Sermersooq aamma Kalaallit Nunaanni Timersoqatigiit Kattuffiat (GIF) suleqatigiinnissamik isumaqatigiissuteqarput. Isumaqatigiissuteqarnikkut Sermersooq kommunini siuttunngortinnissaa siunertaavoq, Kalaallit Nunaata nunani nunarsuarmi aalanerpaaffinngortinniarneqarnerani. Suleqatigiinnissamik isumaqatigiissut, 2024-miit 2027-mut atuuttoq, GIF-ip anguniagaanik ataqatigiissaarisuussaaq aamma ulluunerani paaqqinnittarfinnik, meeqqat atuarfiinik ingerlatsinermi aamma Kommuneqarfik Sermersuumi innuttaasut ulluinnarni aalanissamik siuarsaavigineqarnissaannik atugarissaarnissaannillu, tassani ilaallutik kommunimi peqqissumik patajaatsumillu peqatigiiffilerineq.
Isumaqatigiissummi suliniutit atuutilersinneqarnissaat qulakkeerumallugu suliniutinut suleqatigiissitaliortoqassaaq. Suliniutinut suleqatigiissitami Kommuneqarfik Sermersuumit aamma GIF-imit sinniisoqassaaq.
Borgmesteri Avaaraq Olsen suleqatigiinneq pillugu oqarpoq: “Isumaqatigiissut una innuttaasutta peqqinnerulernissaannut aalanerullutillu inooriaaseqalernissaannut alloriarneruvoq pingaarutilik. Kalaallit Nunaanni Timersoqatigiit Kattuffiat suleqatigalugu maannakkut Kalaallit Nunaata nunarsuarmi nunani aalanerpaaffinngortinnissaa pingaartillugu qitiutissinnaanngorparput.”
Kalaallit Nunaanni Timersoqatigiit Katuffianni siulittaasoq Bolethe Stenskov ilassuteqarpoq: “Kommuneqarfik Sermersuup suleqatigilernera assut nuannaarutigivarput. Ataatsimoorluta unammilligassaqarpugut, taamaattumik anguniagaqatigiinnerput isumatusaarneruvoq. Ikioqatigiilluta inuit amerlanerusut timimik aalatitsinerulernissaat angusinnaavarput kiisalu kommunimi sinaakkutit peqatigiiffiillu patajaallisarsinnaavagut.”
Suliniutigineqartussat aningaasaliiffigineqarnissaat kommunip aamma GIF-ip ingerlatsinermut missingersuutigeriigaasigut imaluunniit aningaasaateqarfinnit qinnuteqaqqinnikkut qulakkeerneqartassapput.
