DMI ilimasaarivoq, Tasiilaq pingasunngornermi oktobarip 18-ianni aamma sisamanngornermi oktobarip 19-ianni anorersuassasoq. Anorip sukkassusia sekundimut 25 – 28 m-iussangatinneqarluni anoraasuarneralu ulussaarsuartut sakkortussuseqartoq sekundimut 33 – 38 m-i angumasassallugu.
Taamaattumik atuarfik, meeqqeriviit pisortallu allaffii matoqqaannarallassapput. Kikkulluunniit qitornatik ajornanngippat angerlarsimatiinnassagaat kaammattuutigineqarpoq. Aammattaaq kaammattuutigineqarluni suulluunniit tinginneqarsinnaasut isumannaarluarneqassasut isersimaannartoqassasorlu.
Innuttaasut anorersuarnerata nalaani ikiorneqartariaqalerunik upalungaarsimasunut attaveqarsinnaapput, uunga sianerlutik 36 77 89.
Anorersuaq sapaatip akunnerata sinnerani atuutissammat siunnersuutit uku sillimaffigeqquneqartullu atuukkallaannassapput.