Aallaaseqarneq
Oktobarip aqqaneq aappaani nal. 17 Isle Hessnerip suliaanik saqqummersitsineq nutaaq Aallaaseqarneq-mik qulequtalik ammaanersiorneqassaaq. Saqqummersitsinermi suliai pisoqaanerit nutaarluinnaallu takuneqarsinnaassapput.
1980-ikkunnili Isle Hessner pisunik assigiinngitsunik eqqumiitsuliornikkut eqqarsaatersuuteqarlunilu oqaatiginiagaqartarsimavoq, maani nunanilu allani – amerlasuutigullu eqqumiitsuliap ataatsip iluani maani nunanilu allami pisut sammisarsimallugit. Hessnerip eqqumiitsuliai arlallit Nuummi takussaagaluarput, ulluinnarnili inuppassuarnit takuneqartaraluartut, maanna aatsaat kisimiitillugu saqqummersitsisoqalerpoq.
Eqqumiitsuliornermik Ilinniarfimmeereernermi kingorna (1986-89), Saviminilerinermik Ilinniarfimmi eqqumiitsuliortutut ilinniarsimanini ilavaa. Ilinniarnini Colorado Springsimi University of Coloradomi (1993-95) aammalu Canadami Nova Scotia College of Art and Design (NSCAD) (1998-2000) ingerlateqqissimavaa. Canadami ilinniartuunerata nalaani eqqarsaatersuutinik tunngavilinnik eqqumiitsuliortarnera ineriartoqqissimavoq, aammalu atortussiat annerusut soorlu savimerngit qisuillu atornissaannik soqutiginninnera ineriartoqqissimalluni.
Hessnerip eqqumiitsuliornermi ilisimatusarnikkut ilisimasani aammalu assamminik suliaqarsinnaassusaa marloqiusattut eqqumiitsuliaani takussaasarpoq. Amerlasuutigut angisoorujussuusarput, suliarineqarnerminnilu aalajangersimasumik anguniagaqartaratik. Ilaatigut savimineq kuisassaq saffiuugassarluunniit atortarpai, aammalumi ujaqqat, betoni, atortussallu allat uumassusseqarsimasut, soorlu ammit qisuillu atortarlugit. Hessnerip ulluinnarsiutaasartut maluginiartanngisagullu atortussiatut misissugarisarpai. Aqitsut aserujasullu akerliannik manngertunik annertuunillu sanaartornermi atortussiaasunik akulerussissarpoq.
Saqqummersitsinerup qulequtaa ”Aallaaseqarneq” aallaasinik atuisarnermut tunngavoq, soorlu sorsunnermi piniarnermilu. Qulequtaata eqqumiitsuliat arlallit aallaasinut tunngasut taakkartorpai. Ilaatigut Ruslandip Ukrainemut sorsunnera, ilaatigullu Kalaallit Nunaanni aallaasit maani piniarnermi atorneqartarnerinut. Atortut assigiit, assigiinngitsunut atorneqartut, ataqqineqarlutillu qunugineqartut.
Suliaasa nutaat saniatigut eqqumiitsuliat pisoqaanerit amerlanngitsut takuneqarsinnaassapput, aammalu ilaatigut USA-mi Canadamilu ilinniartuunermini suliarisimasaata titartagartai assitaalu takuneqarsinnaassallutik.
Saqqummersitsineq Eqqumiitsuliornermik Aningaasaateqarfimmit taperneqarpoq. Ammaanersiorneq oktobarip aqqaneq aappaani nal. 17 pissaaq, 2024-milu januaarip 28-ata tungaanut takusarneqarsinnaassalluni.
