Nuummi Atuarfissami nutaami eqqiaasussanik neqeroortitsinissaq pillugu niuertunik oqaloqateqarnissamut ilisimatitsineq qaaqqusinerlu. 2023-p naalernerani suliamut qulaani pineqartumut neqeroortitsinissap allagarsiutigineqarnissaa Kommuneqarfik Sermersuumit naatsorsuutigineqarpoq. Suliassaq taanna pillugu kommune suliffeqarfinnik soqutiginnittunik oqaloqateqarusuppoq.
Niuertunik oqaloqateqarneq suliassaq pillugu isumassarsiorfiulluartumik oqaloqatigiittoqarnissaanik qulakkeerinninnissamik siunertaqarpoq. Suliap ingerlanneqarnera tamarmi pisortat oqartussaaffigisaanni suliffeqarfiinilu nioqqutissanik kiffartuussinernillu pisiniarnermut tunngatillugu neqerooruteqartitsisarneq pillugu Inatsisartut inatsisaat nr. 6, 12. juuni 2019-imeersonaapertorlugu ersarissumik ingerlanneqassaaq. Pisiortorfiusinnaasut arlaannaalluunniit neqerooruteqartitsinermut tunngavinnik sunniuteqarnissaminnut periarfissaqanngillat. Taamaattorli niuertunik oqaloqateqarnermi immikkut ittut eqqumaffigisassat inaarutaasumik neqeroortitsinermi tunngaviusussanik iluarsiissuteqarsinnaanermut pissutissaqartitsisinnaapput.
Kalaallit Nunaanni neqeroortitsisarnermut inatsimmi aamma aalajangersarneqarpoq:
Kapitali 5 Niuernissaq pillugu siumoortumik oqaloqatigiittarneq, siunnersuisarneq il. il. § 10 Neqerooruteqartitsinnginnermi niuernissaq pillugu pisinissamik nalunaaruteqartoq oqaloqateqarsinnaatitaavoq, neqerooruteqartitsinermi atortussat imaat pillugit. Imm. 2. Pisinissamik nalunaaruteqartoq niuerneq pillugu siumoortumik oqaloqateqassappat aalajangersagaq malillugu oqaloqatigiinnissap imassaa pisiniap uppernarsaasersinnaasariaqarpaa.
Neqerooruteqartitsinissamik saqqummiisoqarnissaa Kalaallit Nunaanni Danmarkimiluunniit soqutigineqassappat taava kommunimut saaffiginnissutigineqarsinnaavoq e-mail una aqqutigalugu: udbud@sermersooq.gl. Tamatuma kingorna TEAMS-ikkut ataatsimiinnissamut imlt. Nuummi kommunip allaffissuani ataatsimiinnissamut qaaqqusisoqarumaarpoq. Pisiniartarnermi Neqeroortitsinermilu immikkoortortaq niuertunik oqaloqateqarnissamik neqeroortitsinissamillu ingerlatsisuussaaq.