Kalaallit Nunaanni Qatserinermik Ilinniarfimmi ilitsersuisutut ilinniarneq Nunatsinni tamaneersut ilinniartut 12-it peqataaffigisaat naammasseqqammerpoq. Taamatut nikeriarneq Kalaallit Nunaanni upalungaarsimanermi annertuumik pitsaasumillu sunniuteqarnissaa naatsorsuutigineqarpoq.
“Ilitsersuisunik nutaanik ilinniartitsineq Kalaallit Nunaanni upalungaarsimanermi pingaaruteqartuuvoq. Taakku qatserisartunik nutaanik ilinniartitsinermi aamma qatserisartooreersut piginnaasaminnik attassiinnarnissaannut aalajangeeqataasuulluinnassapput,” Kommuneqarfik Sermersuumi Upalungaarsimanermi pisortap Jes Damgaard Andersenip oqaatigaa.
Peqatigitilluguttaaq qatserinermut sungiusartarfiup eqqaamiuusunut akornusersuutaanera annikillisarniarlugu sumiiffissaa nutaaq Kommunalbestyrelsip 2023-mi septembarimi akuersissutigaa. “Maannakkut inissisimaffigisaa eqqaamiuusunut akornusersuutaasarnera ilisimaarivarput, ajornartorsiullu tamanna pimoorullugu iliuuseqarfigerusullugu,” Upalungaarsimanermi pisortaq Jes Damgaard Andersen oqarpoq.
Akuersissuteqarnermut tapiliullugu qatserinermut sungiusartarfiup sumiiffimmut allamut nuunneqarnissaanut kommunimi pilersaarusiorneq ingerlavoq, naatsorsuutigineqarlunilu sumiiffimmi pineqartumi eqqaamiuusunut akornusersuutaannginnerussasoq.
Kiisalu qatserinermi sungiusartarfiup maannakkut inissisimaffigisaani akornusersorneqarnerpaamut Dyrenes Venner-imut ajuusaarneq ersersinniarlugu koorimik angisuumik tunissuteqarneq pivoq.
