Pingasunngorneq ulloq 27. septembari 2023 Tasiilami innuttaasut Najukkami Ataatsimiititaliamit Inuusuttut Kulturikkut illuanniillu Igdlomit ikiorneqarlutik eqqagassanik katersuinermi peqataapput.
Tasiilami innuttaasut 100-t sinnerlugit 17:00-imiit 18:30-mut illoqarfimminnik saliillutik takujuminarsaallutillu ataatsimoorput. Suliniut pisariillisarniarlugu peqataasut illoqarfimmi sumiiffinni assigiinngitsuni eqqagassanik katersisut sisamanut agguataarneqarput.
Inuusuttunik tunniusimasunik tallimanik, gruppinut aqutsisutut atuuffeqartunik peqataatitsinermigut Inuusuttut kulturikkut illuat Igdlo iluatsilluarneranut sunneeqataavoq. ”Inuusuttoqatigiit akornanni ikorfartoqatigiinneq kinguaariit assigiinngitsut suleqatigiinnerannut nukittunerusumut assersuutaalluarpoq,” Ole Jens Lundblad, Tasiilami Najukkami Ataatsimiititaliami siulittaasoq oqaluttuarpoq.
Kusanarluinnartumik eqqagassanik katersereernerup kingorna eqqugassatsialannik makitsisoqarpoq. Pingaarnertut eqqugassanut ullunut 14-inut igaassat, oqarasuaat angallattagaq, KNI-mut pisiniutissaq 500 koruuninik nalilik, radiorarlu ilaapput. Tamanna aaqqissuussamut pissanganartitseqataavoq, innuttaasunullu peqataasunut tunniusimalluarnerannut akissarsiassaalluni.
Siorna eqqagassanik katersineq Najukkami Ataatsimiititaliamit aaqqissuunneqarpoq. Siusinnerusukkut aaqqissuussat aamma iluatsilluarnikuupput, Tasiilamilu innuttaasut illoqarfimminnik eqqiluitsuutitserusullutik kusanartuutitserusullutillu tunniusimanerat ersarippoq. Maannalu Tasiilami materialgårdip eqqagassat katersorneqarsimasut peernissaat isumagissavaat.
Aaqqissuussap piviusunngortinnissaannut innuttaasunullu nuannaarlutik piumassuseqarlutillu peqataasunut tamanut qujanaq.
