Maaji naalersoq illoqarfiup atuarfiini 7. klassini atuartut sullisilersorsimapput, 2023-mi Saligaatsoq sioqqullugu Nuummi eqqakkanik katersuillutillu torersaagamik. Massakkut 8. klassini atuartut aamma pingasunngornermi septembarip ulluisa 27-anni atuarfimmiinnatik illoqarfimmi silami sumiiffinni arlalinni igitanik sapinngisamik amerlanerpaanik katersissapput.
Illoqarfiup atuarfiini assigiinngitsuni 8. klassit arfinillit tamarmik immikkut sumiiffissaminnik tunineqarput taamaattumillu illoqarfimmi sumiiffinni assigiinngitsorpassuarni torersaasoqarpoq.
Ulloq Hans Lyngep Atuarfiata minihaliani naggaserneqarpoq, tassani atuartut ataatsimut suliaqarnerminni angusaminnik naatsorsuipput. Atuartut maajimi eqqakkat katersaat ataatsimut 750 kilo missiliorlugit oqimaassuseqarput, massakkut 640 kilo angusimallugit. Ileqqoq malillugu atuartut aningaasanik akissarsisinneqarput, peqatigiinnerminni imaluunniit atuarnermi sammisaqarnerminnut namminneq atorsinnaasaat.
Ulloq iluarsaassiviusoq Nuup Bussiinit aamma Qalut Vóninimit aningaasaliiffigineqarpoq Nuummilu Najukkami Ataatsimiititaliamit aaqqissuunneqarpoq qanimut CSR Greenland aamma Kommuneqarfik Sermersuup Avatangiisinut immikkoortoqarfia suleqatigalugit.
Eqqakkanik katersinissamut immikkoortiterinissamullu piareersaatit ilagivaat atuartut sissami torersaanermut aamma paasissutissanik katersinermut ilitsersuummik tunineqarnerat. Ilitsersuut Kalaallit Nunaanni Pinngortitaleriffik suleqatigalugu suliarineqarpoq taannalu Nordic Coastal Cleanup, CSR Greenlandip attaveqatigisartagaanut ilaasoq, isumassarsiorfigalugu suliarineqarpoq.
