Paamiuni meeraaqqerivimmi Meeqqami igaffiup nutarterneqarnera pillugu Meeqqanut Atuarfeqarnermullu Ingerlatsivimmit meeraaqqeriviup atorneqanngikkallarnissaa aalajangerneqarpoq.
Nutarterisoqarnera pissutigalugu meeqqanut sulisunullu allanik ininik ujarlernissaq pisariaqarpoq. Ingerlatsivimmit paarlakaannissamut pilersaarut suliarineqarpoq, taamaalilluni pineqartut tamarmik utaqqiisaasumik inissilluarneqarnissaat qulakkeerneqassaaq.
Paarlakaannissamut pilersaarut
Paamiuni Meeraaqqerivik Meeqqami meeqqat sulisullu atuareernerup kingorna ornittakkamut Nanumut nuunneqassapput.
Atuareernerup kingorna ornittagaq Nanoq Klub Kalaalermut nuunneqarallassaaq.
Nutarterineq qanoq sivisutigissanersoq suli nalunarallarpoq. “Ersarinnerusumik paasissutissanik piumasaqarpugut, paasisaqarneruguttalu attuumassuteqartut tamarmik ilisimatissavagut,” Meeqqanut Atuarfeqarnermullu Ingerlatsivimmi fagchefi Ane Marie Lynge Møller oqarpoq.
Immikkoortortaqarfimmit qaqugu nutarterineq naammassissanersoq qaqugulu meeraaqqerivik ammaqqinneqassanersoq suli oqaatigineqarsinnaanngilaq. Angajoqqaat, sulisut attuumassuteqartullu allat ataavartumik paasitinneqartassapput.