Ullumikkut ulloq Naalagaaffiit Peqatigiit Nunarsuaq tamakkerlugu nutserisunut ullorititaraa. Kommuneqarfik Sermersuumi allattariarsornikkut nutserineq oqaluttariarsorlunilu oqaluttaaneq ulluinnarni pingaaruteqarluinnartuupput. Taamaattumik nutserisut ulluannut atatillugu nutserisoqarfitsinni suleqatitta suliaat pingaaruteqartut pinngitsoorneqarsinnaanngitsullu sammissavagut. Nutserinermi piginnaasaat assigiinngitsorpassuarnik peqquteqartumik pingaaruteqarput – ilaatigut suliffimmi ataatsimik marluinnilluunniit oqaaseqartunik atorfilinnut inissaqartitsisumi oqaatsit assigiinngitsut atorlugit sulisoqarsinnaassammat.
Ane-Julia Dalager 2020-mili Kommuneqarfik Sermersuumi oqalutsitut nutserisutullu sulilerpoq, nutserisoqarfimmi ilinniarnertuutut ikiortitut aallartilluni. Mikisuararsuunerminiilli oqaatsit attaveqatigiinnerlu soqutigisarai…
”Peroriartorninni kalaallisut, qallunaatut tuluttullu oqaatsit atugaraakka, meeqqerivimmilu meeqqat ilaat tusilartuummat ussersorneq ilinniarpara. Allanik oqaloqateqarsinnaanngimmat nalligingaarakku anaanaga piumaffigaara ussersornermik ilinniarteqqullunga.”
Kommuneqarfik Sermersuumi oqalutsitut Ane-Juliap suliassaata ilagaat illup iluanit avataaniilluunniit allakkat kalaallisut qallunaatullu pissarsiassaassagaangata kommunalbestyrelse kommunillu sulisui allat ikiussallugit. Imaluunniit aaqqissuussani, oqaatsit suulluunniit atoraluaraanni peqataanissaq oqariartuutigineqartullu paasinissaat periarfissaassappat. Ane-Julia Dalagerip suliffiup allanngorartuunera nuannaraa, suliassamilli aalajangersimasumik nuannarinerusaqarpoq.
”Kommunip assigiinngitsuni pikkorissartitsinerani oqaluttaaneq nuannarivara. Assigiinngitsorpassuarnik ilikkagaqartarpunga, kommunillu iluani piginnaasat assigiinngitsut paasisaqarfiginerussallugit assut soqutiginartillugit. Tamanna aamma tamaani oqalutsitut sulinermik nuannarinninninnut peqqutaaqataavoq – assigiinngitsorpassuarnik nutserisaratta meeqqerivinni ulluinnarni ajornartorsiutiniit kommunalbestyrelsip ataatsimiinnerani oqaluuserisassaanut tamaasa paasisaqarfigisaratsigit.”
Ane-Julia suleqatinilu kommunip innuttaasunik naapitsinerani pingaaruteqartorujussuartut inissisimapput. Kommuneqarfik Sermersuumi innuttaasutut kalaallisut qallunaatullu, apeqqutaalluni innuttaasup suna piumaneruneraa, naapinneqarnissaq periarfissaajuaannartussaavoq. Taamaattumik nutserineq illup iluani sulinerinnaanngilaq, innuttaasunilli pitsaanerpaamik sullissinissamut periarfissiivoq. Kommunip innuttaasullu akornanni allattariarsornikkut oqaluttariarsornikkullu attaveqatigiittoqarsinnaavoq. Pingaartumik toqqaannartumik oqaluttaanermi ukkassinissaq pingaaruteqartoq, Ane-Julia nassuiaavoq. Taamaattumillu suliaq pissanganartuuvoq nuannersorlu.
”Ajornarnerpaasarpoq kalaallisuumiit qallunaatuumut toqqaannaq oqaluttaassagaangatta. Oqaaseqatigiit naanissaa utaqqeqqaarlugu nutserilluta aallartissinnaasaratta tassami kalaallisut oqalunnermi oqaaseqatigiit naaneranni aatsaat isumaata annerpaartaa paasineqartarmat. Taamaattumik oqaaseqatigiimmik ataatsimik kinguussaaqqajuaannarnermi suut oqaatigineqarnersut eqqaammallaqqittariaqarput. Inuttut uanga nuannarisorujussuuara, sukkassusaa piffissamilu tassaniiffaarinnissara nuannarisuugakku.”
