Innarluutilinnut tarnikkullu nappaatilinnut Immikkoortortaqarfimmi sulisut innuttaasullu sullinneqartut assut nuannisarpoq, ullormi tassani grill-ereqatigiittoqarpoq, erinarsoqatigiinneq, nalorsitsaarineq allanillu unamminerit ingerlanneqarput.
Naak sila pissutigalugu silami aaqqissuussaq ingerlanneqarsinnaanngikkaluartoq tuaviinnaq pilersaarut B malinneqarpoq. Taamaattumik Sammisassaqartitsinissamut katerisimaaqateqartitsinissamullu neqeroorut Kammagiinni nalliuttorsiorneq ingerlanneqarpoq. Ulloq aallarnerlugu aaqqissuisut Malene Henningsen Jensen aamma Heidi Paneeraq Møller, tamarmik immikkut Innarluutilinnut tarnikkullu nappaatilinnut Immikkoortortaqarfimmi aqutsisuusut, tikilluaqqusipput. Grill-eriviup kissassernerani unamminissat pissanganarluinnartut aallartinneqarput, unammisullu kiagulaavissorput. Unammissutigineqartut ilagaat puussiaaqqanik eertanik imalinnik nalussineq aamma frisbeerneq.
Unamminerit ilungersornalaartut qaangiummata neriffissanngorpoq. Grill-erut kissassimammat nerisassallu piariilermata pulaartunut kaattunut sassaalliutigineqarput. Nerinermi oqaloqatigiittoqarlunilu illaqatigiittoqarpoq. Kingorna pilersaarutit malillugit timersornarpallaanngitsunik sammisaqartitsisoqarpoq – Tassunga ilanngullugit erinarsoqatigiinnerit nalorsitsaarinerillu.
Pilersaarutit naammassilermata aaqqissuusseqataasoq nuannaarlunilu qiimavoq . “Kiinnat taamak amerlatigisut nuannaarpasittut takullugit nuanneqaaq. Tassa tamanna takorusullugu qangali piareersaalerpugut. Suleqatikkalu innuttaasut aaqqissuussani taamaattuni nuannisartut takullugit assut nukissanittutut ippugut. Innuttaasut nuannaarnerat soorunami sulisunut uatsinnut tuniluuttarpoq”, aaqqissuusseqataasoq aamma Qinngutsinni aqutsisoq Malene Henningsen Jensen oqaluttuarpoq.
