Kommuneqarfik Sermersuumi meeqqat inuusuttullu akornanni atugarissaarnaq, ilikkalertornissaq ineriartornissarlu pitsanngorsarumallugu, Kommuneqarfik Sermersuumi meeqqat inuusuttullu pillugit siunnersuisarfiata, MISI-p 2022-mi siusinaartumik pitsaaliuinermillu iliuuseqartarnissaq ukkatarilerpaa. MISI-p ukiumoortumik nalunaarusiaani Meeqqanut Atuarfeqarnermullu Ataatsimiititamut saqqummiunneqaqqammersumi tamanna atuarneqarsinnaavoq.
MISI-miit pitsaaliuinermik suliniuteqarnerunissaq naleqqussarfigineqarpoq ilaatigut meeqqat attaveqarfigisarnerujussuat ukkatarineqarnerulerluni. Taamatut suleqatigeeriaaseqarneq atuarfinnik meeqqerivinnillu suleqatigiilluarnerulernissamik aamma perorsaanermut tarnillu pissusiinik suliaqartarnermut aporfiusinnaasut siusissukkut iliuuseqarfigineqarneratigut meeqqanik inuusuttunillu ataatsimoorussamik ikiorneqarnissaanni sulinermi aallaaveqartinneqarpoq.
“Inersimasut meerartallit ikiortarpavut, taakku akornanni ilungersuumminartut piulersarmata. Taamatut periuseqalernermi meeqqat inuusuttullu atugaannik, ilikkalertornissaannik ineriartornissaannillu pitsanngorsaanissamut periarfissatsialaavoq,” Meeqqanut Atuarfeqarnermullu Ataatsimiititami siulittaasoq, Juaaka Lyberth, taamatut oqarpoq.
Taamatut allanngortiterinermi pisariaqanngitsumik utaqqisitsinani perorsaanikkut tarnillu pissusiinik ilisimasalittut siunnersuisarnissaq qitiutinneqarpoq. Atuarfinni aqutsisut ilinniartitsisullu siunnersuisartut suleqatigiinnissaq pillugu ataatsimiikulasarnissaannut neqeroorfigineqarnikuupput MISI-lu peqatigalugu suliassat immikkut ukkatarisariallit pingaarnersiortarlugit. Suliassat tassaasinnaapput meeqqanut ataasiakkaanut tunngasut, aammali meeqqerivinni ilungersunarsinnaasunut tunngasuusarlutik.
“MISI-p, atuarfiit meeqqeriviillu akornanni suleqatigiinnerulernissaq pingaaruteqarpoq. Suleqatigiittoqarneratigut meeqqat atugaat, ineriartornerat ilikkalertornerallu tamakkiinerusumik isigineqarnerulernissaa ukkatarineqalersinnaavoq,” Juaaka Lyberth oqarpoq.
Saaffiginnissuteqarnissamut immersuiffissaq MISI-mit atuutilersinneqarpoq, taannalu atorlugu meqqerivinniit meeqqat pineqartut kinaassusaat taanngikkaluarlugit perorsaanermut tunngasunik siunnersorneqarnissamut noqqaassuteqartoqarsinnaavoq. Taamatut suliniuteqarneq iluarineqarpoq meeqqerivinnilu suliniutinut pitsaaliuinernut tunngasunut ilisimasaqarnerulernermik sulisunillu ikorfartuinerunermik kinguneqarluni.
MISI-mi periusissiaq suliarineqaleruttorpoq, taannalu naapertorlugu MISI-mi sulisut, pingaarnersiukkat iliuutsillu atuarfinni meeqqerivinnilu meeqqanik sulisunillu sapinngisamik pitsaanerpaamik ikorfartuutaasut ataatsimoorunneqarnissaat qulakkeerneqassaaq.