Kommuneqarfik Sermersuumi innuttaasunut sisamanngorneq aggustip 17-ianni ulloq pingaaruteqarpoq. Nuummi, Paamiuni, Ittoqqortoormiini kiisalu taakku nunaqarfiini atualeqqaartoqarmat. Ulloq ukiorpassuarni eqqaamaneqartussaq, kaffillerfiusoq kalaallisoorfiusorlu minnerunngitsumillu ulloq inini atuartitsiffiusuni aqerluusat piiaatillu siullermeertumik atuiffigineqartussaq.
Ullumikkut ulloq atuarfinnut Ukaliusamut aammalu Samuel Kleinschmidtimut immikkuullarilluinnartuuvoq, tassa naggammik atualeqqaartitsiffiummata. Ullumikkut atuartut siunissamilu atualersussat ukiup tulliani atuarfimmut nutaamut ”Atuarfik Inussummut” illoqarfiup qeqqanut nuuttussaapput.
Ulloq atualeqqaarfiusumut atatillugu Kangillinnguit Atuarfiat alakkarparput, tassanilu assilisat ataani takusinnaavatit:
