2021-mi kommunalbestyrelsinut qinersisoqarnerata kingorna siullermeerluni Nuup avataani kommunalbestyrelse ataatsimiilerpoq. Tamanna pissaaq marlunngornermi aggustip 29-anni kommunalbestyrelse Paamiuni katersortarfimmi Taqqissuummi ileqquusumik ataatsimiilerpat.
”2021-mi kommunalbestyrelsinut qinersisoqarnerata kingorna siullermeerluni Nuup avataani kommunalbestyrelse ataatsimiilerpoq, tamaattoqarlerneralu immikkuullarissuuvoq. Naak kommunalbestyrelsimi ataatsimiinnerit nittartakkakkut malinnaaffigineqarsinnaasaraluartut, Paamiuni ataatsimiinnissaq uagutsinni Paamiunilu innuttaasunut immikkuullarissuussaaq”, borgmesteri Avaaraq Olsen oqarpoq.
Kommunalbestyrelse Ileqquusumik ataatsimiinnera sioqqullugu kommunalbestyrelsimi ilaasortat ulloq sioqqullugu immikkut ittumi sammisaqassapput. Tamanna pissaaq ataasinngornermi aggustip 28-anni – sammineqartussaq tassaalluni missingersuutit. Immikkut ittumi sammisaqartoqarnerani sammisat suunissaat kommunalbestyrelsip aalajangertarpaa, tassanilu sammisamut itisiliisoqartarpoq.
Marlunngornermi kommunalbestyrelse ataatsimeereerpat kommunalbestyrelsimi ilaasortat pingasunngornermi aggustip 30-anni aallannginnerminni sumiiffiit assigiinngitsut pulaassaavaat. Imarsiornermik Ilinniarfik, Royal Greenland, neqitsersuisarfik, umiatsiaaqqerivik, puttasut assigisaallu alakkarternissaannut periarfissaqarumaarput. Taakku sumiiffiit aalisarnermut tunngassuteqarput.
Kommunalbestyrelsemi ilaasortat sapaammi aggustip 27-anni Paamiunut tikissapput pingasunngornermilu aggustip 30-anni aallaqqissallutik.