Borgmesteri Avaaraq Olsen qanittukkut sapaatit akunnerini marlunni paasisassarsiorluni Tasiilami eqqaanilu angalaqqammerpoq, kommunillu kangiani nunaqarfiit tallimaasut tamakkerlugit tikeraarlugit. Nunaqarfinni tamani tikeraarneqarneq ilassilluarneqarpoq.
“Tunumi nunaqarfinni innuttaasut amerlaqaat nunaqarfimminnik pimoorussillutik inerisaaqataajumasut, amerlanertigulli misigisimasarput aporfissaqartuarlutik” Avaaraq Olsen oqarpoq.
Taassuma erseqqissaatigaa pingaartumik sanaartornermut tunngasuni ajornakusoortitsisoqartartoq, sanasunik amigaateqarneq amerlasuutigut suliassat naammassineqartannginnerannik kinguneqartarluni. Nunaqarfimmiut aamma misigisarpaat suliassat naammassineqartannginnerat, assersuutigalugu puttasut, immamut singinneqarneq ajortut, aammalu kommunimi illu sullivinni amigaatit kiisalu angallatinut iluarsaasarfiit pitsanngorsarneqarneq ajorneri.
Tamanna pitsaanngitsoq borgmesterimit nassuerutigineqarpoq: “Nunaqarfimmiut ajornartorsiutigisartagaat angalanissaq sioqqulluguli ilisimareerpakka, pissutsillu itinerusumik ilisimaarilerlugit. Aaqqissuussaanerput nukittorsartariaqarparput, taamaalillutik tunngaviusumik sanaartugassatigut suliassat kommunimi inoqarfinni tamani suliarineqarsinnaalerniassammata,” Avaaraq Olsen oqarpoq. Tunumi angalaniarneq ajornartoorfiusartutut ilisimaneqarpoq. Tamannalu pissutigalugu, sapaatit akunneri marlungajaat Tasiilami nunaqarfiinilu tallimaasuni angalavugut. Tamannali uggornanngeqaaq, Avaaraq Olsen isumaqarpoq: “Nuannaarutigaara tulluusimaarutigalugulu Tunumi nunaqarfiit tamakkerlugit tikissinnaagatsigit. Uanga borgmesteritut pingaartippara, innuttaasut tamarmik uannik oqaloqateqarnissaminnik periarfissaqarnissaat kommunimullu kissaatigisaminnik apuussisinnaanissaat”
