Kommuneqarfik Sermersooq aalajangerpoq Ivittuuni Piiaaffik aamma Atortussiassat pillugit katersugaasivik Paamiuni ammarneqassasoq. Katersugaasivimmiittut ukiuni arlalinngortuni toqqortaatigineqarsimapput massakkulli kikkunnit tamanit takuneqarsinnaaqqilissapput.
Ivittuuni Piiaaffik aamma Atortussiat pillugit katersugaasivik assigiinngitsunik katersugaasiviuvoq, kulturikkut oqaluttuarisaaneq taamatullu pinngortitamik ilisimatusarnermi immikkut sammisaqarluni katersugaasiviugami. Piiaaffikup Ivittuut nunataata sannaa aamma piiaaffikumi inuuneq aallaavigalugit katersugaasiviup aatsitassarsiorfiup ingerlanneqarnera aamma sumiiffimmi nunamilu tamarmi atortussiat qitiutillugit pingaartippai. Taamatut kulturip oqaluttuassartaanik saqqummersitsinermi taamani Kalaallit Nunaanni Ivittuuni aatsitassarsiorfiusumi inuuneq qitiutinneqarpoq.
Katersugaasiviup ammaqqinneqarnissaa illuatungeriinnit sivisuumik kissaatigineqarsimavoq. Katersugaasivimmiittuutigineqartummi toqqortaatigineqartut Kalaallit Nunaata oqaluttuarisaanerani aatsitassarsiorneq pillugu pingaarutilimmik oqaluttuassartaqarpoq. Aatsitassarsiorneq ilaatigut sorsunnersuup kingulliup inerneqarneranut pingaarutilimmik aalajangiisuusimavoq. Taamanikkut Ivittuuni piiaaffikumi orsugiak piaarneqarpoq. Orsugiak aluminium-iliornermi atorneqartarpoq, taamanikkut amerikamiut sorsuutinik timmisartuliornerminni atorfissaqartilluagaat.
Suliniummi katersugaasiviup aqutsisua Vinni Birkedal ataqatigiissaarisuuvoq. Oqaatigivaa: ”Assorsuaq nuannerpoq atortussiat aatsitassallu pillugit katersugaasivik ammaqqissagatsigu. Aatsitassat nunarsuarmi minnerunngitsumillu inuiaqatigiinni kalaallini pingaaruteqarluinnartuupput. Atortussianik piiaaneq ulluinnarnilu inuuneq tassaapput Kalaallit Nunaanni katersugaasiveqarnermi paasissutissiissutigissallugit puigorneqalaartartoq, taamaattumillu katersugaasiviup uuma oqaluttuarisaanermut tamatumunnga tunngasut pingaarutillit paasissutisseeqataaffigissavai.”
Kommunip aalajangerpaa katersugaasivik Paamiuni, KGH-p illuutigisimasaani, B-56-imi ammarneqassasoq, taanna toqqorsivittut peqqumaasivittullu atorneqarnikuuvoq. Taamaattorli takusaasunut qaqugu ammarneqassanersoq suli ilisimaneqanngilaq, illutassaa annikitsumik iluarsagassaammat.
Utaqqiisaa piffissaq saqqummersitsinissamut piareersarnermut atorneqarpoq. Tassani takornarissat soqutiginnilersinneqarnissaat pingaartinneqarpoq, taamaalilluni taakku illoqarfiup aqqusaarnissaa orniginerulissammassuk. Aammattaaq immikkut pingaartinneqarpoq meeqqanut immikkoortoqarnissaq, Paamiuni atuartut ilaanneeriarlutik ornissinnaasaannik naligalugillu paasisitsiffigineqarlutik.
”Inuit aatsitassat pillugit katersugaasivik pillugu soqutiginnitsilersinnaanerat ajornakusuussasoq ilisimalluinnarparput. Taamaattumik saqqummersitsinissaq ilusilersorlugu aallartereerparput, inunnit aatsitassat assigiinngitsut qanoq inuiaqatigiinnut pingaaruteqarsimanerat sulilu pingaaruteqarnerat paasitikkusullugu. Kalaallit Nunaanni aatsitassat pillugit oqaluttuarisaanermut tunngatillugu inuit alapernaasilernissaat anguniagarivarput. Alapernaaserneq, atuarfinni atuaqatigiinnut apuunneqartoq, aatsitassat suliassaqarfinnut assigiinngitsunut tunngassuteqarmata, kissaatigaara”, Vinni Birkedal oqarpoq.
