Borgmesteri Avaaraq Olsen aamma kommunaldirektøri Ole Jakobsen Tasiilamut eqqaanilu nunaqarfinnut tikeraalerpoq, tunumi najugallit naapinnissai qilanaaraat. Tikeraarneq juulip 22-aniit aggustip tallimaata tungaanut sivisussuseqassaaq, tikeraarnerlu ataatsimiinnernik, pisussanik assigiinngitsunik nunaqarfinnullu angalaarnermik imaqassaaq.
Angalanermi pilersaarut aallartissaaq juulip 22-anni isikkamik arsarlutik unammisaqattaartut naammassineranni medaljenik agguaanermik. Ulluni tulliuttuni ataatsimiinnerit pingaarutillit, Inuussutissarsiornermut Siunnersuisoqatigiit, Najukkami ataatsimiititaliaq aammalu kalaalimineerniarfimmut alakkaanermik imaqassaaq.
Borgmesteri Avaaraq Olsen innuttaasut naapinnissaannut, apeqqutigineqarusuttut aammalu nunaqarfinni pissutsit pillugit paasisaqarluarnissamut eqqartueqatigiinnissamut qilanaarpoq.
”Tasiilamut taassumalu nunaqarfiinut tikeraarnissannut qilanaarpunga. Inuit arlallit naapittussaavakka suliffeqarfiillu assigiinngitsut pulaartussaallugit, naapitsinerit taamaattut suleriaqqinnissamut paasisanik isumassarsiorfissanillu pissarsilluarfiusarput”, borgmesteri Avaaraq Olsen oqarpoq.
Nunaqarfinnut tikeraarneq
Tiilerilaaq, Sermiligaaq, Kulusuk, Isertoq aamma Kuummiit tikeraarneqassapput, borgmesterip aammalu kommunaldirektørip taakkunani najugaqartut pisariaqartitaallu paasisaqarluarfigerusuppai. Nunaqarfinnut tikeraarnermi innutaasut ullup-qeqqarsioqatigineqassapput kiisalu nunaqarfinni aqutsisut aamma kommunimi atorfillit naapinneqassallutik.
Nunaqarfinnut tikeraarnerit ima ullulerneqarput:
Marlunngorneq juulip 25-anni – Tiilerilaaq
Sisamanngorneq juulip 27-anni – Sermiligaaq
Tallimanngorneq juulip 28-anni – Kulusuk
Ataasinngornermi juulip 31-anni – Isertoq
Sisamanngornermi aggustip pingajuanni – Kuummiit
Ullup-qeqqarsioqatigiinneq nal. 12.00—miit 14.00-ip tungaanut katersortarfinni piumaarput.