Majoriaq Nuuk massakkut misiliutigalugu suliniummik aallartitsiniarpoq, innuttaasunut ilinniagaqarusullutik meeqqat atuarfiannit misilitsikkusuttunut ajornannginnerulersitsisumik.
Majoriaq Nuuk aggustimiit misiliutigalugu suliniummik aallartitsissaaq, sungiussiartuaarneq paasiniaanerlu ingerlanneqassapput, ingerlaavartumik atuartussanik tigusisoqartassaaq ingerlatsinerlu pimoorussinerunerusoq ingerlanneqarluni. Taamatut iliornikkut amerlanerit ilinniagaqalersinneqassapput.
”Naammattoortarpagut amerlasuut fagi ataaseq marlulluunniit kisiisa amigaatigisaraat ilinniarnertuunngorniarfimmut isernissaminnut imaluunniit inuussutissarsiutitut ilinnialernissaminnut. Ullumikkut aaqqissugaanera eqaappallaanngilaq, ilinniartut uagutsinni ukioq atuarfiusoq naallugu atuartariaqartarmata. Tamannalu allanngortikkusupparput”, Majoriaq Nuummi centerlederi, Malik Skifte, oqarpoq.
Innuttaasut ilinniagassatut takorluukkaminnut isernissaminnut faagimik ataatsimik marlunnilluunniit amigaateqartut massakkut fagi ataaseq marlulluunniit tigusinnaalissavaat piffissamilu ullumikkornit sivikinnerusumi naammassisinnaallugit. Assersuutigalugu qaammatit marlussuit atorlugit matematik pimoorullugu ingerlanneqarsinnaalissaaq skemamillu taakkununnga naleqqussakkamik tunineqartassapput taamaalillutillu sukkanerusumik ilinniarfissaminnut piareerlutik.
”Aaqqissugaaneq ullumikkutut ittoq malikkaanni amerlasuunut taanna ajornartorsiortitsisarpoq taakkumi ukioq atuarfiusoq naallugu atuartariaqartarmata. Massakkut faginik ataasiakkaanik neqerooruteqarluta misilissavarput taamaalillutillu uagutsinni atuarnerat sivikinnerussaaq. Taamatut iliorlutik ilinniagassatut takorluukkaminnik sukkanerusumik aallartissinnaalissapput”, Majoriaq Nuummi centerlederi, Malik Skifte, oqarpoq.
Misiliutigalugu suliniutip aamma Majoriaq Nuuk ingerlaavartumik ilinniartunik tigusisarnissaanut periarfississavaa. Taamaalilluni ilinniagaqarniartoq faginillu ataasiakkaanik amigaateqartoq ingerlaannarluni aallartissinnaavoq, ukioq atuarfiusoq tulliuttoq utaqqeqqaarnagu.
Suliniut una nutaaq aamma qanorpiaq iliornissaminnik nalornisunut periarfissiissaaq.
Suliniummut siunnersorti Kaaka Lund ilanngussivoq: ”Suliniutip aamma sumik ilinniagaqarnissamik paasiniaanissaq periarfissippaa, ilinniagaqartutut ilinniagaq suna toqqassanerlugu nalornigaanni imaluunniit neqeroorutinik allanik atuagarsornertaqanngitsumik ingerlanneqartunik pisariaqartitsisoqassappat tamanna ammaanneqarpoq.”
Misiliummik suliniut 2023-mi aggustip aallaqqaataani aallartinneqassaaq soqutiginnittullu tamarmik tamatuma kingorna toqqaannartumik Majoriaq Nuuk qinnuteqarfigalugu saaffigisinnaavaat.