60-inik imaluunniit sinnerlugit ukioqarpit? Kommunitsinnilu utoqqaat atugaannik soqutiginnippit? Taava massakkut Kommuneqarfik Sermersuumi Utoqqaat pillugit Siunnersuisooqatigiinnut ilaasortanngornissannut periarfissaqarputit.
Kommuneqarfik Sermersuumi 2013-imiilli Utoqqaat pillugit Siunnersuisooqatigeeqalerpoq. Utoqqaat pillugit Siunnersuisooqatigiit tallimanik ilaasortaqarlutillu sinniisoqarput.
Utoqqaat pillugit Siunnersuisooqatigiit siunertaraat:
- kommunip utoqqarnut tunngasunik politikkimik ilusilersuineranut piareersaasiorneranullu atatillugu kommunalbestyrelsimut siunnersuisartutut atuunnissaq
- kommunimi innuttaasunut utoqqarnut tunngasunik oqallinnermi peqataanissaq
- kommunimi innuttaasut utoqqaat kommunalbestyrelsillu akornanni attaveqaatitut atuunnissaq
- kommunimi innuttaasut utoqqaat atugarisaat pillugit paasissutissiinermik siuarsaaneq
- kommunimi peqatigiiffinnik, atuisut siunnersuisooqatigiivinik suleqatigiikkuutaanillu kommunimi utoqqaat atugaannik pitsanngorsaaniarlutik sulisunut suleqataanissaq isumassarsiornissarlu
- sulinikkut utoqqaat namminneerlutik aalajangiisinnaanermik pisinnaatitaaffeqarnerannut, sunniuteqarnerannut inuunerminnilu assigiiaartumik atugassaqartitaanissaannik siuarsaanissaq
Utoqqaat pillugit siunnersuisooqatigiit inunnut ataasiakkaanut pissutsinik ilanngullugit apeqquteqaatinik, suliani inunnut tunngasunik, naammagittaalliuutinik il. il. suliaqartassanngillat.
Kommuneqarfik Sermersuumi maannakkorpiaq ilaasortamik ataatsimik aammalu ikinnerpaamik sinniisussamik ataatsimik pissarsiortoqarpoq. Ilaasortat sinniisullu tamakkerlutik 2025-imi nalinginnaasumik siunnersuisooqatigiinni tulliani qinersinermi qineqqusaassapput.
Utoqqaat pillugit siunnersuisooqatigiit ukiumut 4 – 6-riarlutik naapillutik imaluunniit oqarasuaatit/ videokonference atorlugit ataatsimiittarput.
Inuttut ataasiakkaatut imaluunniit peqatigiiffik sinnerlugu qineqqusaarnissamut periarfissaqarpoq. Siunnersuisooqatigiinnut ilaasortaaneq nammineq kajumissuseq tunngavigalugu aamma akissarsiaqanngitsumik atuuffiuvoq.
Kajumigigukku qinnuteqaatit uunga nassiuguk si@sermersooq.gl kingusinnerpaamik 11. juuli 2023.
Utoqqaat pillugit Siunnersuisoqatigiit pillugit uani paasisaqarnerusinnaavutit – https://sermersooq.gl/kl/committee/utoqqaat-siunnersuisoqatigiiffiat/ – ilaatigut tassani nanisinnaavatit Utoqqaat pillugit siunnersuisooqatigiit ileqqoreqqusaat, imaqarniliat assigisaalu.