Utoqqaat angerlarsimaffiini marluusuni Utoqqaat Illuani Ippiarsummilu nerisassat kusanasaarneqarput najugaqartut immikkut ittumik nerisassanut assigiinngitsunut pingasuusunut nereqatigiinnissamut qaaqqussaammata.
Arctic Import kommunimi utoqqaat angerlarsimaffiisa iggaviinut nioqqutissanik tunniussisartuusoq aamma igasunik marlunnik ikiorteqarput nerisassiornermut ikiuuttussanik. Utoqqaat angerlarsimaffiini najugallit pingasunik assigiinngitsunik nerinissaminnut qilanaartuutissaqarput tassaasunik aalisakkanik siuleqqiat nunatta pissarititaneersut, sava aalartitsilluni siataq kinguleqqiutigineqarpullu kaagit assigiinngitsut.
Persuarsiorluni nereqatigiinnissamut immikkuullarissumik allaanerusumillu tunniussinissaq isumaavoq. ”Nuannaarutigaarput iggavimmi sulisut suleqatigalugit nerisassanik assigiinngitsunik nerisassiornissamut piffissaqarsinnaagatta. Nerisassioriaatsimik immitsinnut unammillernissamut periarfissaqaleriataarpugut peqatigitillugulu najugaqartut immaqa sungiusimanngisaannik nerisassiornikkut misigisaqartillugit” Nuummi Arctic Importimi tuniniaanermi pisortaq, igasutullu ilinniarsimasoq Benjamin V. Andersen oqarpoq.
Nangippoq: ”Anguniagaq utoqqarnut assigiinngitsunik pingasunik nerisassiornermiit annertuneruvoq. Aallaqqaataanilli nunatta pissarititaasa nerisassanut akuutinnissaat kissaatigivarput. Tassungalu peqatigitillugu neriuutigaarput iggavimmi igasut isumassarsitissinnaallutigit. Isumassarsiat ulluinnarni najugaqartunut nerisassiornermi immaqa atorsinnaasaat.”
Utoqqaat angerlarsimaffiannit suliniut nuannaarutigineqarpoq, tassalu anguniagaavoq utoqqaat innuttaaqataasut pitsaasumik malugissutsimikkut misigisaqartinneqarnissaat. ”Inuunermi sumulluunniit killikkaluaraanni pingaaruteqarpoq nuannersunik qilanaarisinnaasanik misigisaqartarnissaq. Malugissutsinut tunngavoq tassanilu nerisassat pingaaruteqarput. Taamaattumik najugaqartut persuarsiortumik nerisassanik tunineqarlutik nuannaarnerat takullugu nuannerpoq” Utoqqaat Illuani pisortaq, Kathrine Lerch-Amondsen oqarpoq.
