Ulloq maajip 24-anni 2023-mi Suliffeqarnermut Isumaginninnermullu Ingerlatsivik inuit innarluutillit pillugit politikkip nutarterneqarnissaanut atatillugu Tasiilami innuttaasunik ataatsimiititsivoq. Politikki kommunimi inunnut innarluutilinnut tunngasunik suliaqarnermi siunnerfiliissaaq.
Kalaallit Nunaat Naalagaaffiit Peqatigiivisa inuit innarluutillit pillugit Isumaqatigiissutaannut ilaalernikuuvoq, tassanilu sullitat pillugit ima erseqqissaasoqarluni:
”Inunnut innarluutilinnut ilaapput inuit sivisuumik timikkut, tarnimikkut, silassorissutsimikkut imaluunniit misigissutsimikkut piginnaanikillisimasut, piginnaasanik mattussisut allat sunneeqataanerisigut inuit allat assigalugit inuiaqatigiinni tamakkiisumik peqataasinnaanerannik akornusiisinnaasut”.
Innuttaasunik ataatsimiititsinermi peqataasunit oqaatigineqarput, misilittakkatik tungiminniillu isigalugu, innuttaasunik innarluutilinnik peqateqartarneq inuiaqatigiinnilu akimmisaarutit. Tasiilami aaqqissuussaanikkut unammilleruminaatsut qitiutinneqarput, tassunga ilaallutik innuttaasut qulaajaavigineqarnissamut, sunngiffimmi neqeroorutinut, ineqarnikkut, ilinniarnissamut suliffissatigullu periarfissaat.
Peqataasunut tamanut qujanaq.
