Ulluni, maajip aallaqqaataaniit pingajuanut, borgmesteri Avaaraq Olsen pisortaqatigiit peqatigalugit Paamiunut tikeraarput. Avaaraq Olsen borgmesteritut siullermeerluni tikeraarpoq, tikeraarnerminilu innuttaasut arlallit, sulisut susassaqartullu Paamiuni pissutsit pillugit ataatsimeeqatigai. Tikeraarnerlu Paamiuni inuusuttut kulturikkut illutaarnissaannik inerneqarpoq.
Borgmesteri Avaaraq Olsen, kommunalbestyrelsimi ilaasortaq Dorthe-Marie Mogensen Fontain (S) kiisalu pisortaqatigiit tikeraarneq aallartippaat Majoriaq/Piorsaavimmut pulaarlutik, tassani politikkerit inuusuttut ilinniartut qanimut oqaloqatigaat. Inuusuttut oqaluttuarput ulluinnarni sulerisarnerlutik, taakku isumaat malillugit Paamiuni inuusuttut suut amigaatigineraat aammalu siunissami pilersaarutaat pillugit eqqartueqatigineqarlutik.
”Inuusuttut oqariartuutaat ersaripput. Assersuutigalugu oqaatigaat Paamiuni inuusuttut ataatsimoorfigisinnaasaminnik amigaateqartut. Tassunga atatillugu Tasiilamut isumassarsiorpugut, Inuusuttut Kulturikkut Illuat Igdlo inuusuttunit isumagineqartoq eqqarsaatigalugu. Isumaqarpugut aaqqiissut taamaattoq pitsaasuusoq”, borgmesteri Avaaraq Olsen oqarpoq.
Klubbissaaleqineq pillugu inuusuttut oqaloqatigereernerini politikkerit kommunimilu sulisut Paamiuneersut amigaateqarnermut aaqqiissutaasinnaasumik nassaarsiupallapput. Kommunalbestyrelsilu kingullermik ataatsimiinneranni, maajiip 23-anni aalajangerput Paamiuni inuusuttut kulturikkut illutaassasut, taannalu ullumikkut atuareernerup kingorna ornittakkami Nanumi inissisimanissaa aalajangiunneqarpoq. Pilersaarut malillugu sulisut marluk atorfinitsinneqassapput, taakkuuppullu ingerlatsinermi inuusuttunut ikiuuttussat.
Borgmesterip inuusuttut aamma aperai siunissamut ilinniarnissamullu suut pilersaarutigineraat.
”Qiimmaallannarpoq tusarlugu inuusuttut taamak ersaritsigisumik siunissamut pilersaaruteqarnertut. Ilaat ilinniaqqinnissaminnut qinnuteqareersimapput ilaallu siunissami suliffigerusutaminni ilinniarnermi saniatigut sulilereersimallutik. Inuusuttut piumassuseqarluarnerat tigulluarlugu ukkatarisariaqarparput”, Avaaraq Olsen oqarpoq.
Avaaraq Olsenip pisortaqatigiillu Majoriaq/Piorsaavimmi pulaareeramik multiværkstedimukarput, tassanilu sunngiffimmi immikkoortortami sulisoq, Konrad Lorentzen ulluinnarni suliarineqartartut oqaluttuarai.
Paamiuni inissiassaqarnerup inissisimanera
Borgmesterip Paamiunut tikeraarnerani ulloq siullermi innuttaasut ilaat inissaqarniarneq Paamiunilu pissutsit assigiinngitsut naammaginninnginnertik pillugit akerliussutsimik takutitsinissamik aaqqissuussisimapput. Akerliussutsimik takutitsisuniit taakkartorneqarpoq illoqarfimminni ukiorpassuarni inissianik nutaanik sanaartortoqarsimannginnera, naak inissiarsuarnik isaterinerit ingerlanneqarsimagaluartut. Pissutsit taamaannerisa kinguneraa inuusuttorpassuit ilaquttaminni ukiut arlalinni najugaqartariaqarnerannik, akerliussutsumik takutitsisut isumaqarpoq. Borgmesteri kommunalbestyrelsilu Paamiuni inissiassaaleqineq ilisimalluarpaat, tamannalu missingersuummi takuneqarsinnaavoq, missingersuummimi aningaasat 45 mio. koruunit Paamiuni Tasiilami ukiuni 2023-miit 2026-p tungaanut inissianik sanaartortoqarnissaanut illikartitsisoqarpoq.
Paamiuni INI A/S inissianik attartugassaateqarpoq, taakkuli ima angitigaat innuttaasut inuusuttortaannut akisuallaarsinnaallutik. Kommuneqarfik Sermersooq taamaattumik Ineqarnermut Attaveqaasersuutinullu Naalakkersuisoqarfimmut oqaloqatiginninnertik aallartinniarlugu, misissorniarlugu inissiat minnerulersinneqarsinnaanersut imaluunniit ajornartorsiutaasut aaqqiiviginiarlugu allatut teknikkikkut allannguisoqarsinnaasoq. Kommuneqarfik Sermersooq Naalakkersuisoqarfillu maanna aaqqissuutaasinnaasut pillugit eqqartueqatigiipput.
”Paamiuni inissiarsuit atorneqanngitsut takuakka, aamma Paamiormiut iluarisimaarinninnginnerat paasisinnaalluarpara. Ullut tamarluinnaasa inissiat inoqanngitsut aserfallassimaqisullu takusarlugit tarnimut peqqinnarsimanavianngilaq, nalunagu innuttaasoqartoq inissaaleqisunik. Tamanna aaqqiivigisariaqarparput kommuni inissianik sanaartorneratigut kisianni aamma Namminersorlutik Oqartussat suleqateqatigineratigut, taakkumi inissiat inoqanngitsut pigaat. Aamma oqaatigerusuppara Paamiuni innuttaasut tamat oqartussaaqataaneranni aqqani pisinnaatitaaffitsik atorlugu pissutsinut akueriuminaatsitaminnut pillugu akerliussutsimik takutitsimmata, naqissuserusupparalu oqariartuutaat tusaagakkit”, borgmesteri Avaaraq Olsen oqarpoq.
Aalisartut ataatsimeeqatigineri
Ullormi siullermi ataatsimeeqatiginninnerit naggaserneqarpoq Paamiuni Aalisartut Piniartullu Peqatigiiffianni aallartitat ataatsimeeqatigalugit. Borgmesteri aalisartut piniartullu Paamiuni atugassat atortullu pillugit oqaluttuarnissaannut periarfisseeqqaarpoq. Taakku paaserusuppaat aalisarnermik piniarnermillu inuussutissarsiuteqarnerup iluani ineriartortitsinissamut kommunip pilersaarutai sumut killinnersut. Borgmesteri Avaaraq Olsenip oqaatigaa kommunip pilersaarutai nammineerluni malinnaaffigeqqissaarlugit. Borgmesterimi suleriutsimik nutaamik aallartitsisimavoq, taamaasilluni atorfilittat akulikinnerusumik suliat pillugit politikkerinut paasissutissiisartussanngorlugit, tamannalu qulakkiissavaa pilersaarutit piffissaq eqqorlugu naammassineqartarnissaannut.
”Takuneqarsinnaavoq Paamiut aalisartoqarfiusimasoq aammalu aalisartoqarfiujuarnissaa. Imarsiornermik Ilinniarfeqarpoq, aalisakkerivimmik angisoorsuarmik peqarpoq kiisalu aalisartorpassuaqarluni. Aalisartut pissutsit aaqqiivigineqartussat amerlasuut piumasaraat, tamannalu paasisinnaavara. Naak amerlasuut kommunip isumagissassaannut ilaanngikkaluartut, suliffeqarfiit allat isumaginnittuussut, assersuutigalugu Royal Greenland aamma Nukissiorfiit, suleqatigilluarnerusinnaavagut”, Avaaraq Olsen oqarpoq.
Utoqqaat maligassiuilluartut
Paamiunut tikeraarnermi utoqqaat illuannut Puilasunnguanut aamma pulaartoqarpoq. Tassani borgmesteri aamma pisortaqatigiit tusarnaarpaat najugaqartut sulisullu ulluinnarni suliarisartagaasa avataatigut allanik sulerisarnersut pillugu saqqummiisoqarmat. Tassani Rosannguaq Johansen, utoqqaat illuanni susassaqartitsivimmi sulisoq saqqummiisuuvoq. Taanna oqaluttuarpoq ukiumut pilersaarusiortarlutik, pilersaarusiornermilu utoqqaat peqataatinneqartut taassuma ilisimatitsissutigaa, borgmesterillu maluginiarsimavaa Paamiuni utoqqaat assut eqeersimaarluartut.
”Nittartakkakkut inoqatinut attaveqaatitigut takusarpakka sammisassaqarluartartusi. Tulluusimaarnaqaasi taamak sammisaqartigisarassi, aamma qularutiginngilluinnarpara maani innuttooqatissinnut eqiiallatsitsisarassi, nammineerlusi misigisimassassinnik oqaluttuarnikkut aammalu illoqarfiup oqaluttuartassaanik ilisimasassinnik avitseqateqartarnissigut. Takuakka peqatigisimagisi meeqqat atuarfianni atuartut, inuusuttuaqqat klub Kalaalermi atuisartut, innarluutillit minnerunngitsumillu suliffeqarfinnut pulaartarnisi. Neriuppunga sammisaqarluartarnisi siunissami ingerlatiinnassagisi, illoqarfiummi inuummarinnerulerneranut sunniuteqarluarassi”, borgmesteri Avaaraq Olsen Puilasunnguami najugaqartunut sulisunullu taama oqariartorpoq.
Avaaraq Olsenip borgmesteritut Paamiuni tikeraarnera siulliuvoq, tikeraarnerullu ingerlanerani kommunalbestyrelsimi ilaasortaq Dorthe-Marie Mogensen-Fontain kiisalu pisortaqatigiit peqatigai.
