Kommuneqarfik Sermersuumi kommunalbestyrelsip kissaatigaa Nuuk pillugu illoqarfiit pingaarnersaat pillugu periusissiamik nutaamik suliaqartoqarnissaa. Suliakkiussamullu killeqartumik neqeroortitsisoqarpoq.
Illoqarfiit pingaarnersaat pillugu periusissiamik nutaamik suliaqarnermut pingaarnertut siunertarineqarpoq, innuttaasut pitsaasumik inuuneqarnissaat aallaavigalugu siunissami Nuummi ineriartornerup pinissaa qulakkeernissaa.
”Pingaaruteqarluinnarpoq illoqarfimmi pitsaasumik ineriartornermi sumiiffimmi pissutsit aallaavigalugit periusissiornermi sulineq ingerlanneqarnissaa. Periusissiat malillugit illoqarfimmi ineriartorneq inuiaqatigiinni ineriartornermik aallaaveqassaaq, Kommuneqarfik Sermersuup ukiuni tulliuttuni malittariaqagaanik, annertusisamik nunanut allanut naleqqussarneq, najugaqariaatsit allannguuteqarnerat aammalu innuttaasut katitigaanerisa allannguuteqarnerat eqqarsaatigalugit”, borgmesteri Avaaraq Olsen oqarpoq.
Illoqarfiit pingaarnersaat pillugu periusissiassami pingaaruteqartut ilagaat Nuup avataani illoqarfiit pingasut; Tasiilaq, Paamiut aamma Ittoqqortoormiit pillugit illoqarfik pillugu periusissiamik suliaqarnermi illoqarfiit pingaarnersaat pillugu periusissiap tunngaviliisuunissaa. Tamassuma qulakkiissavaa, illoqarfinni taaneqartuni pilersaarusiorneq Kommuneqarfik Sermersuup anguniagaanut naapertuunnissaa.
Naapertuilluartumik ersarissumillu ingerlariaaseqarnissaq anguniarlugu neqeroortitsinermi tunngavissat suliffeqarfinnut piukkunneqartunut taamaallaat tunniunneqassapput.
”Tamanna isumaqarpoq, suliffeqarfiit piumasaqaatinik naammassinnissinnaasut kiisalu immikkut ilisimasaqarlutillu misilittagaqartut kisimik neqeroortitsinermut peqataasinnaanerinik. Tamaaliornerup qulakkiissavaa suliffeqarfiit piukkunnassuseqarnerpaat suliamut neqerooruteqarsinnaaneranik”, Avaaraq Olsen naggasiivoq.