Canadamiut aatsitassarsiorfiutaat Greenland Resourcesip Malmbergip eqqaani molybdæn pillugu suliniutaanit 140 km missaani ungasitsigisumiittumi Greenland Resources Inc. Ittoqqortoormiini kulturimut tapersiivoq,.
” Greenland Resources Ittoqqortoormiit qanittuani sulivoq taamaattumillu suliffeqarfitsinnit pingaartinneqarpoq Kommuneqarfik Sermersuumik illoqarfimmilu innuttaasunik suleqateqalernissaq tassani najukkami inuiaqatigiit pisariaqartitaannik sammisaqartitsinerit tapersersorniarlugit. Massakkut illoqarfiup katersugaasivia illoqarfiullu tunngavilerneqarneranit ukiut 100-nngornerannik nalliuttorsiorneq pingaartipparput”, Dr. Ruben Shiffman, Greenland Resourcesimi pisortaq oqaluttuarpoq.
Piginneqatigiiffiup aningaasaliinera kingulleq Ittoqqortoormiini katersugaasivimmik aaqqissuussinermut kiisalu Ittoqqortoormiit 2025-mi ukiuni 100-nngortorsiorluni nalliuttorsiutigineqarnissaanut tapiissutaassapput. Ittoqqortoormiini katersugaasiviup aaqqissuunneqarnera pitsaanerpaamik suliarineqassaaq kalaallisut, tuluttut qallunaatullu paasissutissartalerlugu. Tamanna Ittoqqortoormiit oqaluttuassartaanut iluaqutaassaaq Ittoqqortoormiinilu innuttaasut, tikeraartut takornariallu ilanngullugit nutaajunerusumik ilisaritissallugit.
Kommuneqarfik Sermersooq Ittoqqortoormiinilu najukkami ataatsimiititaliaq Greenland Resources Inc. suleqatigiinnissamut isumaqatigiissuteqarfigaat piffissami 2022-2024-mi, aningaasaliinissamut isumaqatigiissullu suleqatigiinnissamut isumaqatigiissummut attuumassuteqarpoq. Greenland Resources Ittoqqortoormiit aningaasatigut tapersissallugu ilaatigut kulturip ingerlateqqinneqarnissaanut atorneqartussanik aningaasaliinissamut isumaqatigiissummi pisussaaffilerpoq. Taamatuttaaq Greenland Resourcesip kommunip suleqatigiinnarnissaanut kissaateqarnini oqaatigaa.
Dr. Ruben Shiffman, Greenland Resourcesimi pisortaq oqarpoq: “Ittoqqortoormiini innuttaasut toqqaannartumik oqaloqatiginissaat najukkamilu inuiaqatigiit kissaataannut naapertuuttumik tapersersuinissaq suliffeqarfimmut pingaaruteqarpoq. Kalaallit qallunaallu oqaluttuarisaanerannut atatillugu Ittoqqortoormiillu ineriartorneranut atatillugu Ittoqqortoormiit ukiunik 100-nngortorsiorluni nalliuttorsiornissaanut peqataanissarput nuannaarutigaarput”.
Kommuneqarfik Sermersuumi Greenland Resourcesimik suleqateqarneq nuannaarutigineqaqaaq. “Nunarujussuarmut kommuniussagaanni pingaaruteqarpoq illoqarfimmik nutarterinermi, attaveqaasersuutinut tunngasuni minnerunngitsumillu kulturikkut ingerlatitseqqiinermi kommunimi illoqarfiit nunaqarfiillu tamaasa ilannguttarnissai. Taamaattumik Greenland Resourcesimut Ittoqqortoormiini kulturimut taperseerusunneranut qujanarujussuaq. Kulturip nukittunerulernissaanut periarfissiivoq”, Avaaraq Olsen, Kommuneqarfik Sermersuumi Borgmester oqarpoq. Nangilluni oqarpoq: “Kulturikkut kingornussassavut illersorneqartariaqarput illersorneqassallutillu kisiannili illersuinnagassaanngillat. Kinguaariinnut kinguaassanullu nuannaarutaasinnaasumik ingerlateqqinneqassapput. Taamaattumik Greenland Resourcesip aningaasatigut tapiineranut qujaqqippugut.”