2014-imili eqqaavissuaq annertuumik iluarsaavigineqalerpoq, taamani suliassaq naammassineqarsinnaanngitsutut ippoq. Massakkut anguniagaq anguneqarpoq, massakkut Eqqaavissuarmik ingerlatsinermut eqqortunik piumasaqaateqalerpoq. Anguniagaqarnermut ilungersuussisimasut sulisut annertuumik qujassutissaqarfigaagut.
Tasiilami eqqaavissuarmik iluarsaassineq 2014-imili ingerlanneqalerpoq. Piffissap ingerlanerani eqqagassat qaleriiaaginnalersimasut iluarsaanneri immikkoortiternerilu tiimerpassuarnik atuiffiusimapput. Iluarsaassinermi anguniagassaq anguneqaraluartoq, sulineq assigiinngitsunik ajornartorsiorfiusimavoq – attaveqaasersuutitigut ajornartorsiutit. Iluarsaassinermi sulineq assigiinngitsunik ajornartorsiorfiusimagaluartoq iluarsaassinerup inaarutaasumik naammassineranut Esani – Kalaallit Nunaat tamakkerlugu Eqqagassalerinermut piginneqatigiiffimmik suleqateqarneq annertuumik pingaarutilimmillu sunniuteqarsimavoq.
Kommuniminngaanniit anguniakkat angunissaannut sulisut ulapissimaqisut qutsavigaavut. ”Tasiilami eqqaavissuarmik iluarsaassineq 2014-imi aallartinneqarpoq, tassani iluarsaassinermut aaqqissuussineq aallartinneqarpoq. Taamani Eqqaavissuup isikkua eqqarsaatigigaanni suliassaq naammassineqarsinnaanngitsutut isikkoqarpoq. Suliassalli tamarmik naammassineqarsinnaapput kisiannili inunnik suliassanik pimoorussisunik pisariaqartitsisoqarpoq Tasiilamilu Materialgårdip tamanna takutissimavaa” Sanarfinermut Avatangiisinullu Ingerlatsivimmi fagchefi Margrethe Rosing Hegelund oqarpoq.
Massakkut Tasiilami eqqagassanik suliaqarnissamut eqqortunik piumasaqaateqalerpoq. ”Iluarsaassinerup aallartinnginnerani eqqagassanik suliaqarnissamut inissaqanngilaq containerillu pisoqqat atorunnaakkat amerlasuut tassaniillutik. Massakkut eqqagassat immikkoortiternissaannut, suliarinissaannut aallarunneqarnissaannullu inissaqalerpoq. Eqqaavissuakoq toqqissunngortinneqarpoq eqqakkallu toqqorneqarsinnaasut kisimik tassaniissinnaapput. Eqqakkat ikuallanneqarsinnaasut poortorneqartarput aallarunneqarlutillu. Qisuit killuganngorlugit naqinneqartarput. Saviminikut aallarunneqartarput.”, Sanarfinermut Avatangiisinullu Ingerlatsivimmi immikkoortortami aqutsisoq Jakob Kofod oqarpoq.
Nangippoq: “Tasiilami Materialgårdimi Immikkoortumik Aqutsisoq, Ulrich Garfuri sulisuilu kusanartumik suliniuteqarput tamannalu kommunimiit tulluusimaarutigisorujussuuarput.
