Sapaammi maajip ulluisa 21-anni Nuummi innuttaasunut tamanut Nuup Saavata siunissami qanoq atorneqarnissaa pillugu workshoppertitsisoqarluni paasisitsiniaasoqarpoq aamma oqaloqatigiinnertalimmik ataatsimiititsisoqarpoq.
Aaqqissuussineq Nuutoqqami ingerlanneqarpoq – Nuup Katersugaasiviani, tassani matut innuttaasunut alapernaatsunut tamanut nal. 13.00 ammarneqarput. Peqatigitillugu silami innuttaasunut inuusunnerusunut aaqqissuussisoqarpoq, kridti atorlugu biilinut uninngasarfik qalipaaffigalugu illoqarfimmi “eqqumiitsuliaq anginerpaaq” suliaralugu peqataatinneqarput.
Innuttaasut soqutiginnittut katersugaasivimmi Nuup Saava qanga qanoq atorneqarnera paasisaqarfigisinnaavaat aamma illoqarfiup nutarternissaanut pilersaarut ”Nuup Saava Nuannarisarput” pillugu, kiisalu isumassarsiaminnik pilersaarutillu imaanik, immikkoortullu siunissami atorneqarnissaa pillugu isummaminnik saqqummiisinnaapput.
Aammattaaq siusinnerusukkut pilersaarut pillugu workshoppertitsisoqarneranit suliat saqqummersinneqarput, tassani Atuarfik Samuel Kleinschmidtimi 6. klassit Nuup Saavanut siunissami takorluukkat pillugit qiortarlugit katitigaat saqqummersinneqarput.
Ilisarititsineq taasinerlu
Pilersaarusiami ”Nuuk Nuannarisara”-mi suliarineqareersut ilagivaat immikkoortumi najugalinnik apersuineq, ilisimasanik, isummanik aamma apeqqutit ammasut atorlugit ilisimasanik katersinerit.
Kommune siunnersuinermik suliffeqarfik Inuva suleqatigalugu innuttaasunik akuutitsinermik suliaqarput. Inuva innuttaasunik akuutitsinermik, workshoppeqartitsinermik kiisalu suliap ingerlanerani kommunip akuunnginnissaanik qulakkeerinninnermik misilittagaqarpoq tamannalu februaarimiit apriili ilanngullugu ingerlanneqarpoq. Inuvap suleqatiginerani allaffeqarfik aamma kommunalbestyrelse innuttaasut Nuup Saavata imarisaanik paasisaqarluarnerulerput, isumassarsiallu suut immikkoortumullu takorluukkat aamma pillugit.
Suliap ingerlanneqarnerani ilisimasat tunngavigalugit kommunimi illoqarfiup pilersaarusiorneranut immikkoortoqarfiup immikkoortup ineriartortinneqarnissaanut assersuutit assigiinngitsut suliarivai, taakkulu takkuttunit toqqaanikkut taaneqarsinnaapput aamma taakku qanoq apeqqutaatiginerannut paasisitsinerannik. Assersuusiani ilaatigut eqqumiitsuliat, kulturi, immikkoortut qorsuttat, inuussutissarsiorneq, tikikkuminassutsillu pingaartinneqarnera ilaatinneqarput.
Ullup ingerlanerani aaqqissuussaq innuttaasunit untritilikkaanit peqataaffigineqarpoq, amerlasuullu isummaminnik anitsinissaminnut atorpaat.
Oqaloqatigiilluni ataatsimiinneq
Katersugaasivimmi aaqqissuussaq naggaserlugu ullormi taasineq mannalu tikillugu suliniummi “Nuup Saava Nuannarisara” angusat saqqummiunneqarput. Kingornatigut pilersaarut pillugu innuttaasut akisussaasunik oqaloqateqarnissaminnik periarfissinneqarput.
”Nuup Saava nuannarisarput” ingerlaqqissaaq
Workshoppeqartitsisoqarnerani isummannik isumassarsianillu saqqummiinissannut periarfissaqarsimanngikkuit, taava suli periarfissaqarputit apeqqutit immersornissaanut uani: https://citizenlabco.typeform.com/to/FojLYkzg
Pilersaarummi alloriarneq tulleq tassaavoq illoqarfiup innuttaanit isumassarsiarpassuit takorluukkallu pissarsiarineqartut suliaralugit ingerlanneqarnissaat. Isumassarsiarpassuit amerlasimaqaat taakkulu tamarmik Nuup Saavata najugalinnut aamma ukiut tamaasa takornarianut amerliartuinnartunut pingaaruteqarnerata pitsanngorsarneqarnissaanik siunertaqarput.
