Ukioq manna Nuummi Nunat Avannarliit Kulturisiornerat tallimassaaneerlugu maajip ulluisa 25-annit 28-annut ingerlanneqassaaq. Ukioq manna pisussat malillugit eqqumiitsuliornermik namminersortumik ingerlataqartut Rasmus Lyberth, FINNi aamma Julie Edel Hardenberg, aamma tusaamaneqannginnerusut soorlu takusassiaq ”Arctic Armpit”, naatsumik filmiliaq ”Before One” (Hans A. Lyngep atuakkiaa ”Before the ship arrived” “Umiarsuup tikinngilaattaani” tunngavigalugu suliaq). Ukioq manna aamma festivalimi ilaqutariinnut meeqqanullu immikkut ittunik misigisaqartoqassaaq, taamaalillutik kikkulluunniit pisussanut takuniaasinnaaniassammata.
Maajip ulluisa 25-anni Nuummi Nunat Avannarliit Kulturisiornerat 2023 aallartinneqassaaq. Taamaattumik tassunga atatillugu festivalimut kikkulluunniit soqutiginnittut ammaanersiornermi aaqqissuussamut qaaqquneqarput maajip ulluisa 25-anni nal. 17.00-18.00 atuakkanik atorniartarfiup saavanut.
Nunat Avannarliit Nuummi kulturisiorneranni ukioq manna qulequtarineqassaaq “unity”, imaluunniit ataatsimoorneq.
”Nunat Avannarliit Nuummi kulturisiornerat aallartinneqarpoq isumassarsiarineqarmat ataatsimoorutta nukittunerussasugut. Ukioq manna nunat avannarliit ukkatariniarpavut, aammalumi issittumiittut allat peqataatinniarlugit. Assersuutigalugu tikeraartorineqassapput angalaqatigiit Canadameersut aamma Sapmí ilaasalu kulturisiornerup ingerlanerani eqqumiitsuliortut Nuummeersut suleqatigissavaat.” Festivaalimi aqutsisoq, Jonas L. Nilsson oqarpoq.
Ammaanersiorneq aallartiinnartoq ataatsimoornermi peqataalivissaatit, peqataasut ataatsimoorlutik ammalortunngussapput pingasut atasut, taava drone qulaatissaaq assiliillunilu. Ammalortut pingasut tassaapput ataatsimoornerup ilisarnaatai aammalu eqqumiitsuliornermut kulturimullu assigiinngissutaasut akimorlugit qilerutaasut.
“Festivaleqarnermi qulequtaq “unity” atorlugu kissaatigaarput eqqumiitsuliortut, takusaasut tusarnaariallu naapikkaangata ataqatigiinnernik pilersitsisarnerup nukittunerulersinneqarnissaa. Ammaanersiorluni takutitsisoqarnera tassaassaaq tigussaasumik ataatsimoornermik pilersitsiffiusoq, peqatigiilluta festivaleqarnermi siullertut misigisassarput” Jonas L. Nilsson, Nuummi Nunat Avannarliit Kulturisiorneranni aqutsisoq oqarpoq.
Ullup qeqqata kingornagut pisortatigoortumik oqalugiarnerit naggasiutigineqassapput aammalu qummoroortartoqassaaq festivalip aallarnernera malunnartinniarlugu.
Ammaanersiorluni takutitsineq ussersorluni oqalutseqarfiussaaq aammalu inunnut tamatuminnga pisariaqartitsisunut issiavissaqartitsisoqassaaq. Takutitsineq Nuummi Nunat Avannarliit Kulturisiorneranni pisussanut ulluni sisamani maajip ulluisa 28-ata tungaanut ingerlasussanut ilaaginnarpoq ataaseq. Ammaanersiornermi peqataaneq akeqanngilaq, kisiannili festivalip ingerlanerani aaqqissuussinernut tamanut peqataaniaraanni pisussat tamakkerlugit peqataanermut isissutissamik Nuummi Nunat Avannarliit Kulturisiornerup nittartagaatigut 350 koruuninik akiliilluni pisisoqarsinnaavoq. Kajumissutsimik suleqataaniarluni nalunaartoqarsinnaavoq, taava festivalimi peqataanermut akeqanngitsumik tajaq pissarsiarineqassaaq. Meeqqat inuusuttullu 12-it ataallugit ukiullit akeqanngitsumik peqataasinnaapput.
Nunat Avannarliit Nuummi kulturisioqatigiinnerat 2023 pillugu
- 2023-mi maajip ulluisa 25-anniit 28-annut ingerlanneqassaaq.
- Assigiinngitsorpassuarnik pisoqarfiussaaq eqqumiitsuliornerup kulturillu iluanni, ilaatigut qitik aammalu isiginnaartitsinerit, tusarnaartitsinerit, assilialiorluni eqqumiitsuliornerit oqallinnerillu.
- Peqataasussat tusaamaneqarnerit ilaatigut tassaapput Kimmernaq, Julie Edel Hardenberg, Rasmus Lyberth, Inuuteq Storch, Finni aamma Katarina Barruk
- Kalaallit eqqumiitsuliortut saniatigut aamma ilaatigut misigisaqarfiusinnaapput nunani tamalaani eqqumiitsuliortut Nunat Avannarlerneersut, Canadameersut aamma Sápmi
- Isissutissat uani pisiarineqarsinnaapput www.nuuknordisk.gl, aammalu tassunga kajumissutsimik suleqataanissamut nalunaartoqarsinnaavoq.
